Qyzylordada uıymdasqan qylmysqa qarsy kúres bólimshesiniń qyzmetkerleri uıymdasqan qylmystyq toptyń áreketin toqtatty, dep habarlaıdy infohub.kz saıty.
İshki ister mınıstrliginiń aqparattyq medıaportaly málim etkendeı, jedel-izdestirý sharalarynyń barysynda Qyzylordada top músheleri kásipkerler men azamattardan kúsh qoldanamyz dep qorqytyp, aqsha talap etkeni anyqtaldy. Sonymen qatar olar bas bostandyǵynan aıyrý oryndarynda jazasyn ótep jatqandarǵa kómek kórsetý syltaýymen «ortaq qor» jınaýmen aınalysqan.
Tergeý barysynda quqyqqa qarsy árekettiń kóptegen epızody qujattaldy, sanksıalanǵan tintý júrgizilip, onyń nátıjesinde travmatıkalyq jáne pnevmatıkalyq qarý, oq-dári, aqsha qarajaty, sondaı-aq ózge de zattaı dáleldemeler tárkilendi.
Jábirlenýshiler men kýágerlerdiń jaýaptary alynyp, toptyń qylmystyq áreketin rastaıtyn banktik aýdarymdar men sıfrlyq dáleldemeler zertteldi.
Aqsha talap etý, qarýdy zańsyz saqtaý, buzaqylyq jáne uıymdasqan qylmystyq topqa qatysý faktileri boıynsha birqatar qylmystyq is tirkeldi. Kúdikti retinde segiz adam tartylyp, olardyń kóbisine qamaýǵa alý túrindegi bultartpaý sharasy qoldanyldy.
Sotqa deıingi tergeý aıaqtalǵan soń qylmystyq is sotqa jiberildi. Sot úkimimen uıymdasqan qylmystyq toptyń uıymdastyrýshysy men onyń belsendi qatysýshylary ártúrli merzimge — 4 jyldan 11 jylǵa deıin bas bostandyǵynan aıyryldy. Úkim zańdy kúshine endi.