Қызылорда облысында мемлекеттік медицина мекемелері жеке клиникаларға 73 миллион теңгені заңсыз аударған. Бұзушылықтарды облыс бойынша «Әлеуметтік медициналық сақтандыру қоры» КЕАҚ филиалының қаражатын жұмсау заңдылығын тексеру барысында прокурорлар анықтады, деп хабарлайды infohub.kz сайты.
Қадағалау органының мәліметінше, Жаңақорған және Арал аудандарының медициналық мекемелері екі жыл бойы мердігерлердің қызметіне шартта көрсетілген сомадан артық төлеп келген.
Атап айтқанда, «Жаңақорған орталық аудандық ауруханасы» ШЖҚ МКК 2023 жылы мердігерге шарттық сомадан 33,1 млн теңге, ал 2024 жылы 6,6 млн теңге артық аударған.
«Арал орталық аудандық ауруханасы» ШЖҚ МКК 2023 жылы 13,8 млн теңге, 2024 жылы 18,6 млн теңгені белгіленген сомадан артық аударған.
Қадағалау органының араласуынан кейін барлық қаражат сот арқылы мемлекетке қайтарылды, ал кінәлі шенеуніктер тәртіптік жазаға тартылды.
«Сот шешімдерінің негізінде 73 млн теңге толық көлемде өндіріліп алынды», — деп хабарлайды прокуратура.
Бұған дейін «Курсив» республикада міндетті әлеуметтік медициналық сақтандыру (МӘМС) жүйесіндегі қаржылық бақылау тәсілі өзгеретінін жазған. Енді жалған жазбалармен күреске көмектесетін цифрлық платформа күдікті схемаларды анықтап, төлемдерді бұғаттайтын болады. Ең бастысы, жаңа модель қаражат аударылғанға дейін, бірнеше жылдан кейін емес, аномалияларды анықтайды.
Еске салайық, президент Қасым-Жомарт Тоқаев бұған дейін ӘМСҚ-да ауқымды жымқырулар туралы мәлімдеп, Қорды Қаржы министрлігіне беруді қолдаған еді. Ол Қордың жұмысын сынап, бұзушылықтар, жалған жазбалар және құжаттарды бұрмалау туралы айтқан.