Sıkldik sport túrlerindegi sportshylar arasynda tanymal qyzylsha shyryny men nıtraty kóp qospalar júzgishterdiń fızıkalyq ónimdiligine aıtarlyqtaı áser etpeıdi. Osyndaı qorytyndyǵa «Scientific Reports» jýrnalynda jarıalanǵan zertteýlerge jasalǵan júıeli sholý men metataldaý avtorlary keldi, dep habarlaıdy infohub.kz saıty.
News Medical basylymy atap ótkendeı, qyzylsha shyrynyndaǵy nıtrattar men bıoaktıvti qosylystar qan tamyrlaryn keńeıtip, azot oksıdiniń bıojetimdiligin jaqsartady, osylaısha júkteme kezinde ottegi shyǵynyn azaıtady. Buǵan deıin bul júgirý men velosportta shamaly oń nátıje kórsetken.
Alaıda ártúrli deńgeıdegi júzden astam sportshyny qamtyǵan 12 zertteýdi taldaý júzýde bul mehanızmder ýaqyt boıynsha basymdyq bermeıtinin kórsetti. Júzý aldynda qyzylsha shyrynyn ishý qysqa, ortasha nemese sprınttik qashyqtyqtardy júzip ótý jyldamdyǵyna statısıkalyq turǵydan eleýli áser etpedi.
Márege jetkennen keıingi qandaǵy laktat deńgeıi de plasebo tobynyń kórsetkishterimen birdeı boldy, bul metabolıkalyq sharshaý deńgeıiniń uqsastyǵyn kórsetedi. Tirkelgen jalǵyz áser — Borg shkalasy boıynsha sharshaýdyń sýbektıvti seziminiń shamaly tómendeýi, alaıda ol naqty nátıje jaqsarýyna ákelmedi.
Sholý avtorlary kásibı júzgishter úshin qyzylsha shyrynyn ergogendik qural retinde usynýǵa qazirgi derekter jetkiliksiz ekenin atap ótti.