Álemniń birinshi raketkasy Elena Rybakına Qazaqstanǵa jaqynda jasaǵan sapary týraly suraqqa jaýap berip, josparlaǵan isteriniń bárin atqaryp úlgermegenin moıyndady, dep habarlaıdy infohub.kz saıty.
Jýrnalısermen áńgime Pekındegi týrnır aıasynda ótken baspasóz máslıhatynda boldy. Sportshyǵa: «US Open-nan keıin Qazaqstanǵa baryp, jeńisti toılaýdy qatty qalaıtynyńyzdy aıtqan edińiz. Elińizben birge toılaý barysynda sizge erekshe ne este qaldy?» — dep suraq qoıyldy.
Tenısshiniń aıtýynsha, ol jolaı Slovakıada aıaldama jasap, sodan keıin Qazaqstanǵa bet alǵan.
«Kóp saıahattaǵandyqtan, Bratıslavaǵa soqtym. Sosyn Qazaqstanǵa bardym. Keıbir mindettemelerimdi oryndadym. Ókinishke qaraı, qalaǵan nársemdi, mysaly, balalarmen ýaqyt ótkizýdi, birneshe klınıkaǵa barýdy úlgere almadym. Úıde tamasha demalyp, tynyǵyp aldym. Barlyǵy jaqsy ótti», — dep keltiredi onyń sózin «Chempıonat».
Eske salaıyq, Elena Rybakına maýsymdaǵy sońǵy meıdjordyń chempıony atanyp, úshinshi Úlken dýlyǵa tıtýlyn jeńip aldy. US Open qorytyndysy boıynsha ol álemniń birinshi raketkasy mártebesinde debút jasady.
Osydan keıin Qazaqstan Prezıdenti Qasym-Jomart Toqaev Rybakınamen kezdesip, ony qol jetkizgen nátıjelerimen quttyqtady, sondaı-aq kórnekti sporttyq jetistikteri men Qazaqstanda tenısti damytýǵa jáne nasıhattaýǵa qosqan zor úlesi úshin «Barys» III dárejeli ordenimen marapattady.