Álemniń birinshi raketkasy Elena Rybakına Pekındegi WTA 1000 týrnıriniń ekinshi aınalymyndaǵy kútpegen jeńilisine qatysty pikir bildirdi, dep habarlaıdy infohub.kz saıty.
Baspasóz máslıhatynda qazaqstandyq tenısshi sátsizdiktiń sebebi óte tyǵyz keste men jınaqtalǵan sharshaý bolǵanyn túsindirdi. Onyń aıtýynsha, AQSh ashyq chempıonatyndaǵy jeńisten keıin kóp oqıǵa bolyp, tolyqqandy uıyqtap, qalpyna kelýge ýaqyty derlik qalmaǵan.
«Búgin kortta óte aýyr kún boldy. US Open-daǵy jeńisten keıin kóp oqıǵa boldy, durys uıyqtap, qalpyna kelýge ýaqytym bolmady. Alınany quttyqtaımyn, ol tamasha mach ótkizdi. Kezdesýdiń sońyna qaraı aıaǵymda azdap jaısyzdyq sezine bastadym, sondyqtan maǵan qalpyna kelýge ýaqyt kerek. Sondaı-aq aldaǵy birneshe aptadaǵy kesteniń qandaı bolatynyn qaraý qajet. Barlyq jankúıerge qoldaýlaryńyz úshin raqmet. Kelesi jyly Pekınde kezdesemiz», — dep keltiredi sportshynyń sózin Sports.kz.
Rybakına sondaı-aq qalpyna kelý úshin bir apta úzilis alýdy josparlap otyrǵanyn, sodan keıin jarystarǵa qaıta oralatynyn málimdedi.
«Qazir bir apta demalys alamyn. Osy ýaqytta aıaǵym tolyq qalpyna keledi dep úmittenemin, sonda qalǵan týrnırlerde oınap, 2026 maýsymyn aıaqtaı alamyn», — dedi ol.
Eske salaıyq, bir kún buryn Elena Rybakına Pekınde Armenıa ókili Alına Charaevaǵa — álemniń 118-raketkasyna jol bergen bolatyn.