Álemniń ekinshi raketkasy Elena Rybakına AQSh ashyq tenıs chempıonatynda senimdi óner kórsetip, bedeldi týrnırdiń tórtinshi aınalymyna joldama aldy. Úshinshi raýndta qazaqstandyq sportshy álemdik reıtıńtiń 58-satysynda turǵan ýkraınalyq Iýlıa Starodýbsevany 7:6 (8:6), 6:3 esebimen utty, dep habarlaıdy infohub.kz saıty.
1 saǵat 52 mınýtqa sozylǵan báseke Rybakınaǵa ońaıǵa soqqan joq. Birinshi partıada tenısshiler teń oıyn kórsetip, taı-breıkke deıin jetti. Onda sáttilik qazaqstandyq tarapta boldy — 8:6. Ekinshi sette Elena qabyldaýda basymdyqqa ıe bolyp, kezdesýdi 6:3 esebimen senimdi aıaqtady.
Mach statısıkasy Rybakınanyń kúshti servısin kórsetedi: onyń enshisinde 12 eıs, al qosarlanǵan qatelik tek bireý ǵana. Qazaqstandyq birinshi podachadaǵy 34 rozygryshtyń 28-in utyp, 82 paıyz nátıje kórsetti. Starodýbseva bolsa, nebári bir ret eıs jasap, úsh ret qosarlanǵan qatelik jiberdi.
Rybakınanyń belsendi utys oıyndaryndaǵy basymdyǵy erekshe baıqaldy — 33 vınnerge qarsy qarsylasynda 8 ǵana. Al eriksiz qatelikterde qazaqstandyq 30 ret, ýkraınalyq 14 ret qatelesti. Elena 13 breık-poınttyń tórteýin paıdalansa, Starodýbseva úsheýdiń ekeýin ǵana iske asyrdy. Jalpy upaı sany boıynsha da álemniń ekinshi raketkasy qarsylasynan basym tústi — 81:68.
Bul jeńis Rybakına úshin Roland Garros-2026-daǵy sátsizdik úshin revansh boldy. Onda Starodýbseva ekinshi aınalymda qazaqstandyqty 3:6, 6:1, 7:6 (7:4) esebimen sensasıalyq túrde utqan edi. Parıjdegi kezdesýge deıin ýkraınalyq tenısshi álemdik ondyqtaǵy oıynshylardy eshqashan jeńbegen bolatyn.
Tórtinshi aınalymǵa shyǵý Rybakınaǵa US Open-daǵy óziniń úzdik nátıjesin qaıtalaýǵa múmkindik berdi. Bul kórsetkishke ol alǵash ret ótken maýsymda qol jetkizgen edi.
1/8 fınalda Elena «Úlken dýlyǵa» týrnırleriniń tórt dúrkin jeńimpazy Naomı Osakamen (13) kezdesedi. Japonıalyq tenısshi úshinshi aınalymda Elıze Mertensti (20) 6:3, 3:6, 7:5 esebimen utty. Tamyz aıynda Torontodaǵy týrnırde Rybakına Osakany úsh sette jeńgen bolatyn.
AQSh ashyq tenıs chempıonaty — hardta ótetin jyl saıynǵy «Úlken dýlyǵa» týrnıri, meıdjorlar maýsymyn aıaqtaıdy. Alǵash ret 1881 jyly tamyzda ótkizilgen US Open, mıks týrnıriniń keıinge shegerilýine baılanysty ekinshi jyl qatarynan bir apta erte bastalady. Jarystyń jalpy júlde qory meıdjorlar úshin rekordtyq 108 mıllıon dollardy quraıdy. 1978 jyldan beri machtar Nú-Iorktegi Bıllı Djın Kıng atyndaǵy Ulttyq tenıs ortalyǵynda ótedi.
Erler arasynda qazirgi chempıon — ıspanıalyq Karlos Alkaras (3). Ol ótken jylǵy fınalda Iannık Sınnerdi 6:2, 3:6, 6:1, 6:4 esebimen jeńgen edi. Álemniń birinshi raketkasy ıtalıalyq tenısshi tize jaraqatyna baılanysty US Open-2026-dan bas tartty. Áıelder arasynda 2025 jylǵy jeńimpaz — belarýs Arına Sobolenko. Ol sheshýshi machta amerıkalyq Amanda Anısımovany 6:3, 7:6 (7:3) esebimen utqan.