Qazaqstandyq tenısshi Elena Rybakına Sınsınnatıdegi (AQSh) WTA 1000 týrnıriniń shırek fınalynda polák Iga Sventekke qarsy oıynǵa jaraqatyna baılanysty shyǵa almaı, álemdik reıtıńte kóshbasshy bolýdyń biregeı múmkindigin paıdalana almady, dep habarlaıdy infohub.kz.
Týrdyń qazirgi kóshbasshysy Arına Sobolenkonyń 1/8 fınalda kútpegen jerden jarystan shyǵyp qalýy Rybakınaǵa ony basyp ozý múmkindigin ashqan edi. Birinshi orynǵa kóterilý úshin Rybakınaǵa týrnırde kem degende fınalǵa jetý qajet boldy.
WTA reıtıńindegi qazirgi jaǵdaı: Arına Sobolenko (Belarýs) 8575 upaımen kóshbasshylyqty saqtap tur, al Elena Rybakına (Qazaqstan) 8141 upaımen ekinshi orynda.
Eske salaıyq, bul týrnırde Rybakına amerıkalyq Teılor Taýnsendti (94-oryn), polák Magdalena Frenhti (41-oryn) jáne reseılik Dıana Shnaıderdi (14-oryn) jeńgen bolatyn.
Sınsınnatıdegi sátsizdikke qaramastan, Rybakınanyń aldaǵy maýsymda kóshbasshylyqqa shyǵý múmkindigi zor, óıtkeni kelesi iri týrnırde — US Open 2026 — Sobolenko ótken jylǵy tıtýly úshin kóptegen reıtıńtik upaıdy qorǵaýy kerek.
Buǵan deıin «Kýrsıv» Qazaqstannyń birinshi raketkasy Elena Rybakına (2) reseılik Dıana Shnaıderdi (14) 6:4, 6:4 esebimen eki sette jeńip, AQSH-taǵy Cincinnati Open-2026 sýpertýrnıriniń 1/4 fınalyna shyqqanyn jazǵan edi. Jartylaı fınalǵa shyǵý úshin bizdiń tenısshi Torontodaǵy fınaldaǵy jaqyndaǵy qarsylasy — Polshadan kelgen Iga Sventekpen (5) baq synasýy kerek edi.
Qazirgi WTA-1000 Cincinnati Open týrnıri qatarynan 80-shi bolyp otyr. AQSH-taǵy eń kóne týrnır eshqashan ornyn aýystyrǵan emes. Jarystar Sınsınnatıdiń mańyndaǵy Meısonda (Ogaıo shtaty) ashyq hard-korttarda ótedi. Cincinnati Open-2026 áıelder týrnıriniń júlde qory $7,43 mln quraıdy.