Qazaqstandyq tenısshi Elena Rybakına AQSh ashyq chempıonatyndaǵy jeńisin túsindirip, týrnır bastalar aldynda jaraqatyna baılanysty mundaı nátıjege senbegenin, tipti fınaldan keıin de jeńistiń aýqymyn tolyq sezine almaǵanyn aıtty, dep habarlaıdy infohub.kz saıty.
Sheshýshi machta Rybakına Arına Sobolenkony úsh sette jeńdi – 6:4, 5:7, 6:2. Otandasymyz alǵash ret US Open chempıony atanyp, Ýımbldon-2022 men Australian Open-2026-dan keıingi úshinshi «Úlken dýlyǵa» tıtýlyn ıelendi.
Fınaldan keıin birden Rybakına Nú-Iorktegi nátıjesi ózi úshin de kútpegen jaǵdaı bolǵanyn moıyndady.
«Shynymdy aıtsam, bul týrnırge kelgende mundaı nátıje kútpedim. Kishkene jaraqatym bar edi, biraq bári bir jolǵa tústi. Sóz taba almaı turmyn, keshirińizder», – dedi Rybakına marapattaý rásiminde.
Elena sondaı-aq US Open-dy úshinshi ret qatarynan jeńýge múmkindigi bar Sobolenkoǵa da qurmet kórsetti.
«Arına, sen úlken chempıonsyń. Senimen oınaý óte qıyn. Sen baryn saldyń, kortta jan alyp jan berdiń, al men barlyq dopty qaıtarýǵa tyrystym. Seni jáne komandańdy quttyqtaımyn. Jigitter keremet jumys istep jatyr».
Fınal Rybakına men Sobolenkonyń 2026 jyly «Úlken dýlyǵa» týrnıriniń sheshýshi machyndaǵy ekinshi kezdesýi boldy. Qańtarda qazaqstandyq belorýs tenısshisin Australian Open fınalynda jeńgen edi.
Rybakına Artýr Esh atyndaǵy korttaǵy kórermenderge bólek alǵys aıtty. Bul jeńis onyń US Open-taǵy burynǵy nátıjelerin eskersek, erekshe mańyzǵa ıe boldy.
«Osyndaı tamasha jankúıerlerge keremet atmosfera úshin rahmet aıtqym keledi. Shynymdy aıtsam, men munda 10 jyl oınap júrmin, ıá? Eshqashan sátti óner kórsetpedim, bıylǵydaı nátıjege jaqyndaǵan da emespin. Sondyqtan bul jaı ǵana keremet».
Marapattaý kezinde tenısshi osy nátıjege qol jetkizýge kómektesken adamdarǵa bólek toqtaldy.
«Komandama úlken rahmet. Stefanos, Stas, otbasym, barlyq dostarym. Kóp rahmet, jigitter, sender úzdiksiz! Sendersiz munyń bári shyndyqqa syımas edi».
Rybakına sózin týrnır uıymdastyrýshylaryna alǵys aıtýmen aıaqtap, ázirge bolǵan jaǵdaıdy tolyq sezine almaǵanyn moıyndady.
«Bul atmosfera – jaı ǵana keremet. Barlyǵy shyndyqqa syımaıtyn sıaqty. Sondyqtan barlyǵyna kóp rahmet. Iá, kelesi jyldy asyǵa kútemin!»
Nú-Iorktegi trıýmf Rybakına úshin tarıhı US Open boldy. Shırek fınalda Chjendy jeńgennen keıin ol WTA reıtıńinde birinshi oryndy kepildendirdi. Ol WTA jekeleı reıtıńin basqarǵan tarıhtaǵy 30-shy tenısshi atanady.