Álemniń birinshi raketkasy Elena Rybakına Qytaıdyń Ýhan qalasynda ótetin WTA 1000 týrnırine qatyspaıdy. Qazaqstandyq tenısshige aıaǵynyń jaraqatynan keıin qalpyna kelý úshin ýaqyt qajet, dep habarlaıdy WTA, dep jazady infohub.kz saıty.
Sportshynyń jarystan bas tartqanyn týrnır uıymdastyrýshylary málimdedi. Osydan keıin Rybakına ony kortta kórgisi kelgen jankúıerlerge sóz arnap, qoldaýlary úshin alǵys aıtty.
«Meniń oıynymdy asyǵa kútken jankúıerlerge qatty ókinemin. Demalyp, qalpyna kelýim úshin biraz ýaqyt kerek. Túsinistikterińiz ben únemi qoldaý kórsetkenderińiz úshin raqmet. Kelesi jyly kezdesemiz», — dedi Rybakına.
Ýhandegi jarys 12-18 qazan aralyǵynda ótedi jáne osy maýsymdaǵy WTA 1000 sanatyndaǵy sońǵy týrnır bolady. Ótken jyly qazaqstandyq osynda shırek fınalǵa deıin jetken edi.
Týrnırdi ótkizip jiberý týraly sheshim Pekındegi oıynnyń erte aıaqtalýynan keıin qabyldandy. Buǵan deıin «Kýrsıv» Elena Rybakınanyń US Open-daǵy jeńisinen keıin China Open-nyń basynda utylǵanyn jazǵan bolatyn. Ekinshi aınalymda Rybakına álemdik reıtıńte 118-orynda turǵan Armenıa ókili Alına Charaevaǵa jol berdi. Qazaqstandyq birinshi setti utyp, kelesi ekeýinde utyldy — 6:3, 4:6, 3:6.