Qazaqstan quramasynyń fýtbolshysy Maksım Samorodov Reseı premer-lıgasynyń (RPL) aǵymdaǵy maýsymyndaǵy alǵashqy nátıjeli áreketin jasady, dep habarlaıdy infohub.kz saıty.
Groznyıdyń «Ahmaty» segizinshi týrda óz alańynda Mahachkalanyń «Dınamosyn» jeńdi. Kezdesý «Ahmat Arenada» ótip, 3:2 esebimen alań ıeleriniń paıdasyna aıaqtaldy.
Jeńimpazdar sapynda afrıkalyq jartylaı qorǵaýshylar — malılik Kalıdý Sıdıbe (58-shi mınýt) men angolalyq Manýel Kelıaný (85-shi) gol soqty. «Ahmattyń» paıdasyna kolýmbıalyq qorǵaýshy Andres Alarkon avtogolmen erekshelendi (66-shy).
Qonaqtar sapynda reseılik fýtbolshylar — shabýylshy Gamıd Agalarov (48-shi) men qorǵaýshy Temırkan Sýndýkov (64-shi) kózge tústi, ol oıyn sońynda qyzyl qaǵaz aldy (90+5).
RPL maýsymyndaǵy alǵashqy nátıjeli áreketin Maksım Samorodov jasady. Óz komandasynyń birinshi golyna ol buryshtan dopty asyryp berdi, ony Sıdıbe toǵystyrdy. Negizgi quramda shyqqan Samorodovty 85-shi mınýtta Qazaqstan quramasynyń taǵy bir shabýylshysy Ǵalymjan Kenjebek almastyrdy.
Jeńis «Ahmatqa» on upaı jınaýǵa múmkindik berdi. Qazaqstan quramasynyń burynǵy bas bapkeri Stanıslav Cherchesov jattyqtyratyn groznyılyqtar toǵyzynshy orynǵa kóterildi. Mahachkalanyń «Dınamosy» 12 upaımen altynshy orynda tur.