Japonıada ótip jatqan Azıa oıyndarynda qazaqstandyq sablıst Artem Sarkısán shırek fınalǵa joldama aldy — júldege jetý úshin oǵan bir-aq saıys qaldy. İrikteý kezeńinde Sarkısán bes saıystyń tórteýinde jeńiske jetti, al 1/8 fınalda úndistandyq Gısho Nıdhı Kýmaresan Padmany 15:11 esebimen utty, dep habarlaıdy infohub.kz saıty.
Qazaqstannyń áıelder rapırasynyń kóshbasshysy Sofıa Aqtaeva úshin kún basqasha órbidi: toptyq kezeńde ol bes saıystyń úsheýinde jeńdi, biraq 1/8 fınalda Gonkongtan kelgen Nok Je Dafne Chanǵa 11:15 esebimen jol berdi. Sol kezeńde onyń komandalastasy Alına Gnoeva Azıanyń tórt dúrkin chempıony japonıalyq Iýka Ýenoǵa 3:15 esebimen utyldy. Alaıda Gnoeva irikteý saıystarynan (2:3) ótip, pleı-offtyń birinshi kezeńinde úndistandyq Djoıs Ashıta Stalınradjdy 15:14 esebimen jeńgen bolatyn.
Qazaqstandyq sablıst Nurmuhamed Jaılybaı toptyq týrnırden keıin bes saıystyń tórteýinde utylyp, óner kórsetýin aıaqtady. Aldyńǵy kúni shpaga áıelderi Irına Bakaldına men Vladıslava Andreeva shırek fınalda qarsylastaryna jol berip, júldeden bir qadam qalǵanda toqtady.
Azıadalardyń fehtovanıe týrnırlerinde Qazaqstan úsh altyn, tórt kúmis jáne 13 qola medal jeńip aldy. Shpagashylar quramasy eki ret (1994, 2002) chempıon atandy, sondaı-aq Dmıtrı Aleksanın osy qarý túrinen Azıada-2018-de chempıon boldy.
XX Jazǵy Azıa oıyndarynyń saltanatty ashylýy 19 qyrkúıekte ótti. 45 eldiń sportshylary qatysatyn keshendi jarysta 460 medal jıyntyǵy sarapqa salynady: 217-si — erler arasynda, 204-i — áıelder arasynda jáne 39-y — aralas razrádtarda. Azıada-2026-da Qazaqstan quramasynyń sapynda 35 sport túrinen 558 sportshy óner kórsetýde.
Oıyndardyń birinshi kúni qazaqstandyqtar tórt altyn medal jeńip aldy. Veloshabandozdar Rınata Sýltanova men Alekseı Lýsenko, sondaı-aq karateshiler Jolaman Bıgabyl men Sofá Berýlseva Oıyndar chempıony atandy. Aldyńǵy kúni qurama qorjynyna besinshi altyndy MMA saıyskeri Erkinǵalı Búrkitalın, altynshysyn — aralas jekpe-jektegi komandalasy Qadyrbek Shynbaev saldy. Búgin Alekseı Lýsenko Azıada-2026-nyń eki dúrkin chempıony atandy.
Oıyndardyń úshinshi kúninen keıin Qazaqstan beıresmı medal esebinde tórtinshi orynda tur.