Semeıde 45 jastaǵy er adam azamattarǵa «tanystarym arqyly kómektesemin» dep ýáde berip, birneshe ret iri mólsherde alaıaqtyq jasaǵany úshin kináli dep tanylyp, tórt jylǵa bas bostandyǵynan aıyryldy. Bul týraly infohub.kz saıty habarlaıdy.
Abaı oblysy polısıa departamentiniń resmı Telegram-arnasynda jazylǵandaı, aıyptaý úkimin Semeıdiń qylmystyq ister jónindegi aýdanaralyq soty shyǵardy.
«2020-2022 jyldary 45 jastaǵy er adam azamattardyń senimin teris paıdalanyp, túrli syltaýmen olardyń aqshasyn ıemdenip alǵany anyqtaldy», — dedi Abaı oblysy PD-da.
Ol jábirlenýshilerdiń birine memlekettik baǵdarlamalar aıasynda tıimdi baǵamen páter alýǵa kómektese alatyn tanystary bar ekenin aıtqan. Odan aqsha alyp, shyn máninde ýádesin oryndaýǵa nıettenbegen.
Keıin kólik satyp alyp, ony qaıta satý, qurylys materıaldaryn alý jáne ózge de máselelerdi sheshý syltaýymen jábirlenýshiden qaıta aqsha alǵan. Oǵan keltirilgen shyǵynnyń jalpy somasy 9 mln 820 myń teńgeni qurady.
Taǵy bir jábirlenýshige er adam arzan baǵamen jyljymaıtyn múlik alýǵa, múgedektik rásimdeýge jáne memlekettik baǵdarlama boıynsha turǵyn úı kezegine turýǵa kómektesýge múmkindigi men baılanystary bar ekenin aıtqan. Osy syltaýlarmen ol jalpy somasy 5 mln 280 myń teńge aqsha alǵan.
Semeılik er adamnyń kinási sotta zerttelgen dálelderdiń jıyntyǵymen, onyń ishinde jábirlenýshiler men kýágerlerdiń jaýaptarymen, banktik aýdarymdar men úzindi kóshirmelermen rastaldy.
Sot oǵan 4 jylǵa bas bostandyǵynan aıyrý jazasyn taǵaıyndady.
Sonymen qatar sot jábirlenýshilerdiń paıdasyna tıisinshe 9 mln 820 myń jáne 5 mln 130 myń teńge materıaldyq shyǵyndy óndirip aldy (jalpy somasy 14 mln 950 myń teńge).
Úkimmen sottalǵan adamnan jábirlenýshilerdi ótemaqy qoryna 20 AEK — 61 260 teńge mólsherinde májbúrli tólem óndirip alý da belgilendi.