Qazaqstandyq stýdentter men ǵalymdar Ábý Álı ıbn Sıno atyndaǵy Tájik memlekettik medısınalyq ýnıversıtetinde birqatar bilim berý is-sharalaryn ótkizdi. Semeıden kelgen qonaqtar medısınadaǵy jasandy ıntellekttiń praktıkalyq qoldanylýyn jáne dárigerlerdi oqytýǵa arnalǵan zamanaýı sımýlásıalyq tehnologıalardy kórsetti, dep habarlaıdy infohub.kz saıty.
Semeıden kelgen stýdentter men dáriger-rezıdentter tájik áriptesterine jasandy ıntellektti qoldanatyn startaptardy kórsetip, «Leonardo» robot-sımýlátorymen sheberlik sabaǵyn ótkizdi. İs-sharalar Tájikstandaǵy qazaqstandyq medısına kúnderi aıasynda ótti.
Aıta keteıik, usynylǵan jobalar profesor Sáýle Rahyjanovanyń jetekshiligimen ázirlengen. Óz ázirlemelerin qazaqstandyq stýdent-dárigerler Baqytbek Aqylbekov, Sernad Kalıev jáne Adelıa Akımova tanystyrdy.
Densaýlyq saqtaý mınıstrliginiń málimetinshe, tájik áriptesteriniń erekshe qyzyǵýshylyǵyn «HHİ ǵasyr dárigerin daıarlaýdaǵy sımýlásıalyq tehnologıalar» sheberlik sabaǵy týdyrdy. Atap aıtqanda, qazaqstandyq delegasıa «Leonardo» robot-sımýlátorynyń kómegimen oqytý ádistemelerin tanystyrdy.
Vedomstvo Dýshanbedegi qazaqstandyq medısına kúnderi aıasynda Qazaqstannyń jetekshi medısınalyq uıymdarynyń mamandary kardıologıa men kardıohırýrgıadan bastap endokrınologıa, travmatologıa, akýsherlik jáne gınekologıaǵa deıingi keń aýqymdy baǵyttar boıynsha konsýltasıalar, sheberlik sabaqtary, klınıkalyq taldaýlar jáne basqa da praktıkalyq is-sharalar ótkizgenin atap ótti.
Aldyńǵy kúni «Kýrsıv» qazaqstandyq onkologtar tájik áriptesterimen laparoskopıa júrgizý tájirıbesimen bóliskenin jazǵan bolatyn. Atap aıtqanda, búırek, búırek ústi bezi jáne qýyqqa operasıalar jasaldy.