Almatyda «Sergek» avtomatty kameralaryn jalǵa alynǵan elektrosamokat paıdalanýshylarynyń buzýshylyqtaryn baqylaýǵa paıdalaný josparlanýda. Polısıa kıksherıng kompanıalarynyń derekterin óz bazasymen biriktirýdi bastady, dep habarlaıdy infohub.kz saıty.
Almaty polısıa departamentiniń resmı ókili Saltanat Ázirbektiń aıtýynsha, ıntegrasıa aıaqtalǵannan keıin «Sergek» elektrosamokat paıdalanýshylary jasaıtyn buzýshylyqtardy avtomatty túrde anyqtaı alady. Alaıda vedomstvo mundaı tirkeýdi iske qosýdyń naqty merzimin ázirge atamaıdy.
Qazirgi ýaqytta buzýshylyqtardy negizinen patrúldik polıseıler, ýchaskelik ınspektorlar, mobıldi elektropatrýlder jáne samokat patrúlderi anyqtaıdy.
Ázirbektiń sózinshe, 2026 jyldyń basynan beri jol qozǵalysy erejelerin buzǵany úshin 18 myńnan astam elektrosamokat paıdalanýshysy jaýapkershilikke tartylǵan.
«Sergek» qosylǵannan keıin olardy baqylaý avtomatty túrde júzege asyrylady dep josparlanýda. Ol úshin polısıa kıksherıng servısteriniń derekterin óz aqparattyq júıelerimen baılanystyrýy qajet, osylaısha kamera tek buzýshylyqty tirkep qana qoımaı, naqty samokattyń paıdalanýshysyn da anyqtaıdy.
Polısıa «Sergek» qandaı naqty buzýshylyqtardy avtomatty túrde tirkeı alatynyn jáne paıdalanýshylardyń aıyppuldar týraly habarlamalardy qalaı alatynyn ázirge naqtylamaıdy.
Buǵan deıin Qazaqstanda jasandy ıntellekt kómegimen jol-kólik oqıǵasyna deıin qaýipti júrgizýshilerdi anyqtaý josparlanyp jatqany habarlanǵan bolatyn.