Qyrǵyzstandyq aralas jekpe-jek sheberi Rajabalı Shaıdýllaev japondyq Rizin FF lıgasynyń Osakadaǵy týrnırinde tarıhı jeńiske jetti, dep habarlaıdy infohub.kz saıty.
Ol jartylaı jeńil salmaqta (66 kelige deıin) Bellator-dyń burynǵy chempıony amerıkandyq Eı Djeı Makkımen kezdesti. Jekpe-jek úsh raýndqa sozylyp, tóreshilerdiń biraýyzdan sheshimimen aıaqtaldy. Úsh tóreshi de Shaıdýllaevty 30:27 esebimen jeńimpaz dep tanydy.
25 jastaǵy qyrǵyzstandyq kásibı MMA-daǵy 20 jekpe-jeginiń bárinde jeńiske jetti. Ol Rizin FF-tiń jartylaı jeńil salmaqtaǵy tıtýlyn tórtinshi ret qorǵady. Sonymen qatar Shaıdýllaev bos turǵan PFL beldigin de jeńip aldy. Qyrǵyzstandyq amerıkandyq promoýshenniń jartylaı jeńil dıvızıonyndaǵy tuńǵysh chempıony atandy.
Makkıdiń úsh jeńisinen turatyn serıasy úzildi. Ol PFL tıtýlyna úmitker mártebesin maýsym aıynda qazaqstandyq Salamat Isbýlaevty jeńgen kezde alǵan bolatyn. 31 jastaǵy amerıkandyqtyń esebinde qazir 25 jeńis pen úsh jeńilis bar.
Sondaı-aq Osakadaǵy týrnırde qazaqstandyq Qarshyǵa Daýtbek te óner kórsetti. Jartylaı jeńil salmaqta ol japondyq Ren Hıramotoǵa bólek sheshimmen (28:29, 29:27, 28:29) jol berdi.
32 jastaǵy Daýtbek Rizin FF-te alǵash ret jeńildi. Onyń esebinde qazir 19 jeńis, tórt jeńilis jáne nátıjesiz aıaqtalǵan bir jekpe-jek bar. 28 jastaǵy Hıramoto úzdik kıkboksshy retinde tanymal. Kásibı MMA-da japondyqtyń esebinde qazir bes jeńis pen úsh jeńilis bar.