«Shın-Laın» kompanıasy Qazaqstanda koreı tehnologıasymen balmuzdaq óndirýdi, sondaı-aq Koreıanyń Chollabýk-do provınsıasynyń úlgisimen azyq-túlik klasterin qurýdy kelisti. Bul týraly infohub.kz saıty habarlady.
«Shın-Laın» kompanıasy Prezıdent Qasym-Jomart Toqaevtyń Ońtústik Koreıaǵa memlekettik sapary aıasynda jasalǵan kelisimder týraly málimdedi. Atap aıtqanda, Aýyl sharýashylyǵy mınıstrligimen birlesip, balmuzdaq pen sút ónimderin óndiretin jabdyq shyǵarýshy Sungwon Machinery Co. kompanıasymen úshjaqty memorandýmǵa qol qoıyldy.
«Shın-Laın» men Sungwon Machinery Co. ozyq azıalyq tehnologıalarǵa negizdelgen koreı formatty balmuzdaq óndirý jobasyn birlesip iske qosýdy josparlap otyr. Osy tehnologıalardy engizip, beıimdeıtin «Shın-Laın Injınırıń» kompanıasy qurylady. Sóz Dry Coater qurǵaq glazýrleý tehnologıasy, joǵary dáldiktegi sorǵy stansıalary jáne Summer Crunch serıaly óndiristik keshender týraly bolyp otyr.
Koreı tarapy óndiristi jańǵyrtýǵa jáne qosylǵan quny joǵary jańa ónimder jasaýǵa múmkindik beretin ınjenerlik sheshimderdi engizýdi qamtamasyz etedi.
«Bizdiń mindetimiz – koreı tájirıbesin Qazaqstanǵa ákelý, ózimizdiń ınjenerlik quzyretimizdi qalyptastyrý jáne halyqaralyq joǵary standarttarǵa saı jańa ónimder jasaý. Biz myqty tehnologıalyq seriktes tańdadyq jáne bul yntymaqtastyq uzaq merzimdi nátıje beredi dep senemiz», – dedi «Shın-Laın» prezıdenti Andreı Shın.
Kelisim úsh jylǵa eseptelgen. Aýyl sharýashylyǵy mınıstrligi jobaǵa memlekettik organdar tarapynan qoldaý kórsetedi.
Sonymen qatar Shin-Line Group Koreıanyń azyq-túlik ónerkásiptik klasterin damytýǵa járdemdesý ınstıtýtymen Qazaqstanda Ońtústik Koreıanyń basty agrarlyq jáne aýyl sharýashylyǵy ortalyǵy sanalatyn Chollabýk-do provınsıasynyń tájirıbesine negizdelgen zamanaýı azyq-túlik klasterin qurý týraly kelisti. Onda memlekettik Foodpolis klasteri ornalasqan.
Koreıa ınstıtýty óz tájirıbesimen bólisip, Qazaqstandaǵy bolashaq azyq-túlik klasteriniń modelin qalyptastyrýǵa saraptamalyq qoldaý kórsetedi. Ol óndiristik qýattardy, ǵylymı-zertteý zerthanalaryn jáne ınovasıalyq ortalyqtardy bir alańda biriktirýi tıis.
Kompanıada atap ótkendeı, kelisim tek strategıalyq jáne konsýltasıalyq sıpatta, tikeleı qarjylyq ınvestısıalardy nemese múliktik mindettemelerdi kózdemeıdi. Sonymen qatar ol azyq-túlik ındýstrıasyn damytý úshin ozyq azıalyq tájirıbelerdi ıgerýge kómektesýi kerek.
«Shın-Laın» kompanıasy 1995 jyly qurylǵan. Kompanıa brendteriniń qatarynda «Mıshka na polúse» plombıry, «Snegovık» jáne «Belochka» eskımostary, «Bomba» balmuzdaǵy, «Djýsıkı» jemis muzy jáne basqalary bar. «Shın-Laın» quryltaıshylary – Andreı jáne Natalá Shın.
Buǵan deıin «Shın-Laın» japondyq Shigemitsu Industry korporasıasymen kelisim jasasqany habarlanǵan. Kompanıa Qazaqstanda Ajisen Ramen japondyq ramen meıramhanalar jelisiniń franshızasyn damytady.