Ekinshi orta salmaqtaǵy Dúnıejúzilik boks uıymynyń (WBO) álem chempıony brıtandyq Hamza Shıraz qazaqstandyq Jánibek Álimhanulyna qarsy mindetti tıtýl qorǵaý jekpe-jegine daıyn ekenin málimdedi. Brıtandyq boksshynyń aıtýynsha, ol qarsylaspen aıqastyń qarjylyq sharttary tıimdi bolsa ǵana rıngke shyǵady, dep habarlaıdy infohub.kz saıty.
«Biz judyryqtasamyz, jekpe-jekke kelisemiz. Kettik, bastaıyq», — dep keltiredi Shırazdyń sózin The Ring basylymy bas redaktor Rık Rınoǵa bergen suhbatynda.
Aıta keteıik, bastapqyda Shıraz WBO-nyń Álimhanulyn mindetti úmitker etip taǵaıyndaý sheshimin synaǵan bolatyn. Endi brıtandyq boksshy qazaqstandyqpen rıngte kezdesýge daıyn ekenin bildirdi.
Alaıda taraptar ázirge jekpe-jek ótkizý sharttaryn kelise alǵan joq. Shırazdyń aıtýynsha, ol DAZN strımıngtik servısinen, óziniń promoýterlik kompanıasy Queensberry Promotions-tan nemese Álimhanulynyń múddesin qorǵaıtyn Top Rank promoýterlik uıymynan usynys almaǵan.
«Biz kásibı boksshymyz, laıyqty qalamaqy úshin judyryqtasamyz», — dep atap ótti brıtanıalyq.
Komandalar tikeleı kelisimge kele almaǵandyqtan, WBO promoýterlik saýda-sattyqty 16 qyrkúıekke belgiledi. Eń tómengi ruqsat etilgen mólsherleme 300 myń AQSh dollaryn quraıdy.
Shıraz Álimhanulymen jekpe-jekti mansabyndaǵy eń iri aıqas dep sanaıdy, biraq saýda-sattyqtyń qorytyndy somasy mundaı jekpe-jek ótkizýge jetkiliksiz bolýy múmkin dep qaýiptenedi. Brıtandyqtyń aıtýynsha, jaqsy qarjylyq usynys tússe, qazaqstandyqpen jekpe-jekke onyń tarapynan eshqandaı kedergi bolmaıdy.
Shıraz ekinshi orta salmaqtaǵy WBO belbeýin ıelenedi jáne kásibı rekordy mynadaı: 24 jeńis, bir teń oıyn jáne birde-bir jeńilis, onyń 19 jeńisin nokaýtpen alǵan. Sońǵy jekpe-jeginde 25 shildede brıtanıalyq Sımon Zahenhýberdi tóreshilerdiń kópshilik sheshimimen jeńdi.
Eske salaıyq, buǵan deıin Álimhanuly Saýd Arabıasynyń Oıyn-saýyq isteri jónindegi bas basqarmasynyń tóraǵasy Túrkı ál-Sheıhke jarıa túrde joldaý jasap, Shırazben jekpe-jek uıymdastyrýǵa kómektesýin suraǵan edi.
33 jastaǵy Álimhanuly 2026 jyldyń jazynda ekinshi orta salmaqqa aýysyp, osy úshin orta dıvızıondaǵy WBO chempıondyq belbeýinen bas tartty. Ol kásibı rıngte jeńilis kórmegen — 17 jekpe-jekte 17 jeńis, onyń 12-si nokaýtpen.