Shymkentte turǵyndar aýadaǵy jaǵymsyz ıiske jappaı shaǵymdanyp jatyr, al lastaný kózin anyqtaýǵa kirisip ketti. Qala ákimi ekologtarǵa kinálini tabýdy tapsyrdy, dep habarlaıdy infohub.kz saıty.
Qala turǵyndary qolaısyzdyqty qandaı da bir kásiporynnan kórip otyr. «Keıde demalǵym keledi, jatyp alaıyn deımin, biraq tynys ala almaımyn. Tereze ashyq uıyqtaımyz ǵoı. Biraq únemi kúıik, tútin ıisi shyǵady. Keshke qaraı qattyraq seziledi. Iisi ártúrli, biraq árdaıym jaǵymsyz», — dedi jergilikti turǵyn Ásel Málik.
Turǵyndardyń aıtýynsha, jaǵdaı jaz basynan nasharlaǵan — ásirese túnde tynys alý qıyndaǵan. Jergilikti ekologtar alańdaýǵa negiz joq dep sendirip keledi. Qalada aýa sapasyn baqylaıtyn alty beket jumys isteıdi, olar shekten tys kórsetkishterdi tirkemegen. Alaıda bıyl 37 kásiporyn shyǵaryndy kólemin asyrǵany úshin aıyppul arqalady. Mamandar qala turǵyndarynyń sezimin joqqa shyǵarmaıdy, biraq aýadaǵy lastaýshy zattardyń mólsherin tym joǵary ári qaýipti dep sanamaıdy.
«Biz muny ındýstrıalyq aımaqta kún saıyn ashylyp jatqan jańa kásiporyndarmen baılanystyramyz. Mysaly, 2023 jyldan búginge deıin jalpy shyǵaryndy 31 myńnan 40 myń tonnaǵa deıin ósti. Iisti joqqa shyǵarmaımyz. Ol bar, biraq qala quraýshy kásiporyndar da bar. Zıandy shyǵaryndysyz kásiporyn bolmaıdy», — dedi Shymkent boıynsha ekologıa departamentiniń basshysy Ermahan Qozybaev.