Shymkenttegi órt saldarynan 2 myńǵa jýyq abonent kógildir otynsyz qaldy. QazaqGaz Aimaq AQ TJ sebebin atady, dep habarlaıdy infohub.kz saıty.
Ot júk kólikteri men burǵylaý jabdyqtaryn sharpydy. Kelgen órt sóndirýshiler jalyndy sóndirip, onyń turǵyn úılerge taralýyna jol bermedi.
Gaz qyzmetteri otyn berýdi jedel toqtatty. Nátıjesinde 1,5 myń jeke turǵyn úı, 340 páter jáne ondaǵan basqa nysan gazsyz qaldy.
Jer jumystaryn júrgizgen kompanıaǵa qatysty tekserý bastaldy. Buǵan deıin oǵan qaýipsizdik tehnıkasy týraly eskertilgeni aıtylady. «18 tamyzda fılıal mamandary oqıǵa ornyna kelip, gaz qubyrynyń qorǵanysh aımaǵyn kórsetti. Ony belgileý úshin gaz qubyrynyń janynda tehnıkany qoldanyp jer jumystaryn júrgizýge bolmaıtynyn, tek qolmen qazýǵa ruqsat etiletinin eskertti. Alaıda merdiger uıym buny eskermeı, kólbeý-baǵyttalǵan burǵylaý jumystaryn oryndady. Sonyń saldarynan osy apat boldy», — dedi QazaqGaz Aimaq AQ Shymkent óndiristik fılıaly bólimi bastyǵynyń orynbasary Eldar Kýandykov.