InfoHub Logo

Shymkenttiń kóne sıtadeli «Shymqala» tarıhı-mádenı keshenin jóndeýge jáne arheologıalyq qazba jumystaryna jumsalǵan 2,7 mıllıard teńgeniń qaıda ketkeni belgisiz. Bul týraly qala ákiminiń orynbasary Sársen Quranbek málimdedi.

Bul týraly Infohub.kz aqparat agenttigi habarlaıdy.

Qala ákiminiń orynbasarynyń aıtýynsha, týrıserdi ózine tarta bilgen bul tarıhı nysan alty jyl boıy eshqandaı qujatsyz jumys istep kelgen. Memlekettik akti de, qabyldaý-tapsyrý aktisi de rásimdelmegen.

«Shymqala» kesheniniń qarjylyq jaǵdaıy

«Shymqala» tarıhı-mádenı kesheni 2018 jyly ashylǵan bolatyn. 2019-2021 jyldar aralyǵynda arheologıalyq jumystar men ǵımarat qurylysyna 2 mıllıard 700 mıllıon teńge qarajat jumsalǵan. Alaıda, bul qarjynyń naqty qaıda jumsalǵany ákimdikke beımálim. Quqyq qorǵaý organdary bul máselege qatysty tekseris júrgizip, qorytyndy shyǵarady.

Eki jyl buryn keshenniń burynǵy basshysy jemqorlyq áreketi úshin sottalyp, jazasyn ótegen bolatyn. Ol «Archeo-service» JSHS qyzmetkerinen aktilerdi tez qabyldap, aqysyn ýaqytynda tóleý úshin 600 myń teńge para alǵan.

Joǵalǵan jádigerler máselesi

Qazba jumystary kezinde tabylǵan 2801 eksponattyń jeke tulǵalardyń qolynda bolǵany anyqtaldy. Ákimniń talap etýimen 1800-ge jýyq jádiger qaıtarylǵanymen, qalǵan 1000-ǵa jýyq eksponat áli ıesine oralmaǵan. Ákim orynbasarynyń aıtýynsha, eksponattardyń kimde ekenin anyqtaý jáne olardy rásimdeý qıynǵa soǵyp otyr. Jyl sońyna deıin barlyq jádigerdi qaıtarýǵa úmit bildirgenimen, olardyń naqty osy keshennen tabylǵanyna jáne qajettiligine eshkim kepildik bere almaıdy.

Kasadan túsken aqshanyń taǵdyry

Sıtadelge kirý bıletteriniń satylymynan túsken qarajat ta qazynaǵa emes, belgisiz baǵytqa ketken. Zańdylyqty qalpyna keltirý maqsatynda «Shymqala» kesheni Saıası qýǵyn-súrgin qurbandary mýzeıine qosylyp, mýzeıler birlestigi quryldy.

«2018 jyldan beri sıtadelden búdjetke bir tıyn da túspegen. Alaıda, kasalar jumys istep, halyq bılet satyp alǵan. Aqshanyń qaıda ketkeni belgisiz. 2024 jylǵy prezıdent jarlyǵyna sáıkes, jeke memlekettik kásiporyn ashýǵa ruqsat joq. Sondyqtan barlyq mýzeıdi biriktirip, mýzeıler birlestigin qurdyq. Sıtadeldi saıası qýǵyn-súrgin qurbandary mýzeıine qostyq. Memlekettik akt pen qabyldaý-tapsyrý aktisin rásimdep, kasa ashyp, aqshanyń búdjetke túsýi úshin tapsyrma berildi. Túsken aqshany búdjetke almaı, óz qajettilikterine jumsaıdy», – dedi Sársen Quranbek.

Abaı atyndaǵy mýzeı de zańsyz jumys istegen

Mundaı jaǵdaı Shymkenttegi Abaı atyndaǵy mýzeıde de tirkelgen. Bul mýzeı Abaı atyndaǵy kitaphananyń quramyna kirip, eshqandaı quqyqtyq qujatsyz jumys istegen. Ǵımarat pen jer aktisi de rásimdelmegen. Bolashaqta jańa mýzeı salý jospary bar ekeni aıtyldy.