InfoHub Logo

Almatyda esirtki bıznesine jastardy tartýdyń jańa ádisteri anyqtaldy. Polısıa málimetinshe, esirtkini «qoldan-qolǵa» satý ádisi azaıyp, onyń ornyna «zakladka» jáne jasyryn ınternet arqyly satý ádisteri kóbeıgen.

Bul týraly Infohub.kz aqparat agenttigi habarlaıdy.

Almatyda qansha kámeletke tolmaǵan «zakladchıkter» ustaldy

Bıyl Almatyda esirtki bıznesine jastardyń tartylýy aıtarlyqtaı artqan. Qylmystyq kodekstiń 297-baby («Esirtki zattaryn satý») boıynsha jyl basynan beri 158 fakti tirkelgen. Ótken jyldyń osy kezeńinde bul kórsetkish 132 bolǵan.

2026 jyly esirtki «salýshy» retinde alty jasóspirim ustaldy, al ótken jyly olardyń sany tórteý edi.

Esirtki bıznesimen aınalysqan alty jasóspirimniń úsheýi Almatyda oqıdy. Qalǵandary Almaty oblysynan kelgen eki mektep oqýshysy men bir kolej stýdenti. Olar qala syrtynda bilim alǵanymen, qylmys jasaý úshin Almatyǵa kelgen.

Ustalǵandardyń eń kishisi – 16 jastaǵy 10-synyp oqýshysy. Atalǵan alty qylmystyq is boıynsha tergeý jalǵasýda. Kúdiktilerge 10 jylǵa deıin bas bostandyǵynan aıyrý jazasy kesilýi múmkin.

Instagram arqyly «zakladchıkterdi» verbovkalaý

Polısıa málimetinshe, esirtki satýshylar jastardy esirtki bıznesine tartý úshin Telegram-bottar men QR-kodtardan bólek, Instagram-daǵy targettelgen jarnamany da qoldana bastaǵan. Bul jarnamalar áleýmettik jelide jeńil aqsha tapqysy keletin jastarǵa baǵyttalady.

Qazirgi ýaqytta Qazaqstan boıynsha «Kıbernadzor» júıesi arqyly 500-ge jýyq esirtkige qatysty saıt pen paraqsha buǵattaldy.

Almatynyń qaýipti aımaqtary

Esirtkini jarnamalaýǵa qatysty 299-bap boıynsha Almatyda 4 qylmystyq is qozǵalǵan. Esirtki jarnamalary kóbinese beınebaqylaý kameralary az ornalasqan, tynysh aýdandarda kezdesedi. Polısıanyń aıtýynsha, eń kóp taralǵan aımaqtar – Áýezov, Túrksib jáne Bostandyq aýdandarynyń keıbir bólikteri.

Qazirgi tańda jastar arasynda sıntetıkalyq esirtki men psıhoaktıvti zattar keń taralǵan. Olardyń eń qaýiptisi – birinshi qoldanystan-aq táýeldilik týdyratyn sıntetıkalyq esirtkiler.

Balańyzdyń «zakladchık» ekenin qalaı anyqtaýǵa bolady?

Ata-analar úshin balanyń minez-qulqyndaǵy kúrt ózgerister – agresıa, mazasyzdyq, apatıa, qymbat zattardyń paıda bolýy jáne jıi túnde serýendeýi – nazar aýdarýǵa turarlyq belgiler. Eger bala túnde jıi joǵalyp ketip, qaıda baratynyn naqty túsindire almasa, bul ata-analarǵa eskertý bolýy tıis.