Qazaqstandyq altyn óndirýshi Solidcore Resources Japonıadaǵy bes ýchaskede geologıalyq barlaýǵa 25 mln dollar jumsaıdy. Bul sheshim kanadalyq Japan Gold Corp kompanıasymen strategıalyq aláns aıasynda qabyldandy. Keleshekte Solidcore jekelegen jobalardaǵy úlesin 80%-ǵa deıin jetkize alady, dep habarlaıdy infohub.kz saıty.
Kompanıanyń 23 qyrkúıektegi habarlamasyna sáıkes, Solidcore Hokkaıdo men Kúsú araldaryndaǵy Japan Gold ýchaskelerinde úsh jyldyq geologıalyq barlaý baǵdarlamasyn qarjylandyrady. Birinshi kezeń aıaqtalǵan soń kompanıa barlaý nátıjelerine qaraı bir nemese birneshe ýchaskede 49% úles ala alady.
Ekinshi kezeńde Solidcore jobanyń aldyn ala tehnıkalyq-ekonomıkalyq negizdemesin daıyndaýdy qarjylandyrsa, úlesin 70%-ǵa deıin ulǵaıta alady. Banktik tehnıkalyq-ekonomıkalyq negizdemeni qarjylandyrǵannan keıin úlesti 80%-ǵa jetkizýge bolady. Sheshimder ár ýchaske boıynsha jeke-jeke qabyldanady.
Sonymen qatar Solidcore Japan Gold kompanıasynyń ózine taǵy 6,85 mln dollar ınvestısıalady. Kompanıa kanadalyq altyn óndirýshiniń 78,8 mln baǵaly qaǵazyn satyp alyp, onyń 18,81% jaı aksıasyna ıe boldy. Satyp alynǵan varanttar oryndalǵan jaǵdaıda Solidcore úlesi 19,9%-ǵa deıin ósýi múmkin.
Sondaı-aq Solidcore Japan Gold kompanıasynyń keminde 18% úlesine ıe bolǵansha, onyń dırektorlar keńesine eki múshe taǵaıyndaý quqyǵyn aldy. Keńes quramyna Solidcore keńesshisi Vıktor Flores pen komplaens jáne korporatıvtik basqarý jónindegi atqarýshy vıse-prezıdent Tatána Chedaeva kirdi.
Alánsqa bes ýchaske — Hakuryu, Bajo, Mizobe, Ryuo jáne Aibetsu kirdi. Olar tarıhı altyn óndirilgen aýdandarda ornalasqan. Atap aıtqanda, Mizobe ýchaskesiniń geologıalyq qurylymy Japan Gold resýrsyn 13 mln ýnsıa altyn dep baǵalaǵan Hishikari ken ornyna uqsaıdy.
Japan Gold — Japonıada jumys isteıtin kanadalyq geologıalyq barlaý kompanıasy. Onyń geologıalyq barlaý quqyqtarynyń portfeli 3 myń sharshy km-den asady. Solidcore «Astana» halyqaralyq qarjy ortalyǵynda tirkelip, AIX bırjasynda saýdalanady. Kompanıa Qazaqstanda eki jumys istep turǵan altyn óndirý kásipornyn jáne Ertis POX jobasyn basqarady.
Buǵan deıin Solidcore aksıonerlerge óz aksıalaryn keri satyp alý arqyly 1,2 mlrd dollarǵa deıin qaıtarý nıetin jarıalaǵan. Kompanıa 102,9 mln baǵaly qaǵazdy, ıaǵnı aksıonerlik kapıtaldyń shamamen 23,2%-yn, bir aksıasy 11,66 dollardan satyp alýdy josparlap otyr. Ótinimder 12 qazanǵa deıin qabyldanady, al keri satyp alý 30 qyrkúıektegi jalpy jınalysta aksıonerlerdiń maquldaýyn alýy tıis. 1 qyrkúıektegi jaǵdaı boıynsha Solidcore qarajaty 1,4 mlrd dollardy, taza aqshalaı pozısıasy 747 mln dollardy qurady.
Sonymen qatar tamyzda Solidcore enshiles qurylymy Tin One Mining Soltústik Qazaqstan oblysyndaǵy Syrymbet qalaıy ken ornynda taý-ken baıytý kombınatyn salý jobasyn iske asyrý týraly memorandýmǵa qol qoıdy. Investısıalardyń aldyn ala kólemi keminde 150 mlrd teńgege baǵalanady. Jobany iske asyrý Solidcore dırektorlar keńesiniń maquldaýyna baılanysty. Kásiporynda 800-ge jýyq jumys ornyn ashý josparlanýda.