Aqmola garnızonynyń áskerı soty áskerı qyzmetshiniń talabyn qanaǵattandyryp, turǵyn úı komısıasynyń sheshimin zańsyz dep tanydy, dep habarlaıdy infohub.kz saıty.
Áskerı sottyń resmı Telegram-arnasynda habarlanǵandaı, áskerı qyzmetshiniń QR Qorǵanys mınıstrliginiń «Aqmola aýdandyq paıdalaný bólimi» RMM-ne qatysty turǵyn úı komısıasynyń sheshimin zańsyz dep taný týraly ákimshilik isi qaraldy.
Sot anyqtaǵandaı, 2026 jylǵy 9 sáýirdegi №16 sheshimmen áskerı qyzmetshige Astanadaǵy páteri bolǵandyqtan turǵyn úıge muqtaj dep tanýdan bas tartylǵan. Alaıda bul páter ıpotekalyq turǵyn úı qaryzy arqyly satyp alynǵan jáne bankte kepilde tur, al qaryz boıynsha mindettemeler turǵyn úı komısıasyna ótinish bergen kezde oryndalmaǵan.
İs materıaldaryn zerdeleı kele, sot turǵyn úı komısıasy páterdiń ıpotekalyq nesıe arqyly satyp alynǵanyn jáne bank aldyndaǵy oryndalmaǵan mindettemelerdi eskermegen degen qorytyndyǵa keldi. Nátıjesinde komısıanyń bas tartý týraly sheshimi zańsyz dep tanylyp, kúshi joıyldy.
Jaýapkerge talapkerdi raport tirkelgen kúnnen bastap turǵyn úıge muqtaj dep taný týraly qolaıly ákimshilik akt qabyldaý mindeti júkteldi. Sondaı-aq jaýapkerden memlekettik baj salyǵyn tóleý boıynsha sot shyǵyndary óndirildi. Talap qoıý tolyǵymen qanaǵattandyryldy, sot sheshimi zańdy kúshine endi.