Qazaqstanda stýdenttik jataqhanalarǵa ornalastyrýda áleýmettik osal toptarǵa basymdyq beriledi. Bul týraly Joǵary jáne joǵary oqý ornynan keıingi bilim komıteti tóraǵasynyń orynbasary Ákerke Abylaıhan málimdedi, dep habarlaıdy infohub.kz saıty.
Onyń aıtýynsha, respýblıkada 281 jataqhana paıdalanýǵa berilgen, olardyń syıymdylyǵy 72 125 oryndy quraıdy. Onyń ishinde 182-si joǵary oqý oryndarynyń stýdentterine arnalǵan — bul 51 323 oryn.
Eń aldymen, ata-anasynyń qamqorlyǵynsyz qalǵan stýdentterge, múgedektigi bar adamdarǵa, kópbalaly jáne az qamtylǵan otbasylardyń ókilderine, aýyl jastaryna, sondaı-aq «Serpin» jobasynyń qatysýshylary men qandastarǵa oryn beriledi. Sonymen qatar, bul tizimge stýdentterdiń basqa da áleýmettik osal sanattary kiredi.
Ornalastyrýǵa baılanysty máselelerdi jedel sheshý úshin mınıstrlik sıtýasıalyq jáne daǵdarys ortalyqtaryn ashty. Sıtýasıalyq ortalyq Qazaq ulttyq qyzdar pedagogıkalyq ýnıversıtetiniń bazasynda, al daǵdarys ortalyǵy Tynyshbaev ýnıversıtetiniń bazasynda jumys isteıdi. Abylaıhannyń túsindirýinshe, sıtýasıalyq ortalyq stýdentterdi jataqhanalardaǵy bos oryndar týraly habardar etedi, al daǵdarys ortalyǵy fors-majorlyq jaǵdaılarda ýaqytsha turǵyn úımen qamtamasyz etýge kómektesedi.
Sondaı-aq, elimizdiń árbir óńirinde stýdentter úshin ombýdsmender taǵaıyndaldy.
Budan basqa, 2023 jyldyń 1 qyrkúıeginen bastap jetim balalar sanatyndaǵy stýdentter, sondaı-aq I jáne II toptaǵy múgedektigi bar adamdar men bala kezinen múgedekter jataqhanada turǵan jaǵdaıda 29 AEK (100 myń teńge) mólsherinde ótemaqy alýǵa quqyly.
Buǵan deıin «Kýrsıv» Astanadaǵy «kıbersport» ýnıversıtetiniń jataqhanasy áleýmettik jelilerde tańdanys týdyrǵanyn jazǵan bolatyn.