Batys Qazaqstan oblysynyń Syrym aýdanynda jalǵyz baspanasy apatty dep tanylǵan 72 otbasy jańa páterlerge ıe boldy. Jympıty aýylynda eki úsh qabatty úıdi paıdalanýǵa berý rásimi ótip, oǵan oblys ákimi Narıman Tóreǵalıev qatysty, dep habarlaıdy infohub.kz saıty.
Bıyl jalǵyz baspanasy apatty dep tanylǵan azamattarǵa komýnaldyq turǵyn úı qorynan baspana berý jáne bólý tártibi jańartyldy. Tıisti ókilettikter qaıtadan jergilikti atqarýshy organdarǵa berildi. Buǵan deıin osy sanattaǵy azamattardy baspanamen qamtamasyz etý «Otbasy bank» arqyly júzege asyrylyp kelgen.
Oblys ákimi apatty úılerde turatyn turǵyndardy qoldaý tetikteriniń keńeıýi osy baǵyttaǵy jumysty júıeleýge jáne oǵan jańa serpin berýge múmkindik bergenin atap ótti. Jyl sońyna deıin kezekte turǵan osy sanattaǵy azamattardyń 50 paıyzyn baspanamen qamtamasyz etý josparlanýda.
«Prezıdent Qasym-Jomart Kemeluly Toqaev bastamashylyq etken halyq konstıtýsıasynda adamnyń ómir súrý sapasyn arttyrý memleket damýynyń basty strategıalyq baǵyttarynyń biri retinde aıqyndalǵan. Osyǵan baılanysty óńir turǵyndaryn baspanamen qamtamasyz etý mańyzdy mindetterdiń biri. Biz aýyldyq jerlerde turǵyn úı qurylysynyń kólemin ulǵaıtýǵa erekshe kóńil bólemiz. Jyl basynda jalǵyz baspanasy apatty dep tanylǵan 600-ge jýyq azamat baspana kezeginde turdy. Olardyń bir bóligi oblys ortalyǵy men Jańaqala aýdanynda jańa páterlerge qol jetkizdi. Respýblıka kúni qarsańynda kópten kútken baspanaǵa qol jetkizgen jańa qonys ıelerin quttyqtaımyn! Ár otbasyǵa baqyt, bereke jáne molshylyq tileımin!» — dedi Narıman Tóreǵalıev.
Aıta keteıik, Syrym aýdanynda baspana alý kezeginde 800-ge jýyq azamat tirkelgen. Olardyń 160-tan astamy jalǵyz baspanasy apatty dep tanylǵan azamattar mártebesine ıe. Kelesi jyly osy sanattaǵy otbasylarǵa taǵy 36 páterdiń kilti tabystalady.