Jambyl oblysynda áıel qaıtalap ata-analyq mindetin oryndamaǵany úshin ákimshilik jaýapkershilikke tartyldy. Onyń kámeletke tolmaǵan balalarynyń kózinshe jubaıymen birge ishimdik ishkeni sebep boldy, dep habarlaıdy infohub.kz saıty.
Jambyl oblysy sottarynyń resmı Telegram-arnasynda jazylǵandaı, kámeletke tolmaǵandar isteri jónindegi mamandandyrylǵan aýdanaralyq sot anaǵa qatysty kámeletke tolmaǵandardy tárbıeleý jónindegi mindetterdi qaıtalap oryndamaý faktisi boıynsha ákimshilik quqyq buzýshylyq týraly isti qarady (Ákimshilik quqyq buzýshylyq týraly kodekstiń 127-babynyń 2-bóligi).
2026 jylǵy tamyzda Moıynqum aýdanynyń turǵyny Tarazdaǵy ýaqytsha turatyn jerinde jubaıymen birge ortasha dárejedegi аlkogóldik masań kúıde bolǵany anyqtaldy. Úıde onyń 2024 jáne 2025 jyly týǵan eki kishkentaı balasy bolǵan. Bolǵan jaıt týraly polısıa qyzmetkerlerine kórshileri habarlaǵan. Tekserý barysynda turǵyn úıdiń antısanıtarıalyq jaǵdaıy jáne balalardyń tıisti damýyna jaǵdaıdyń múldem joqtyǵy tirkeldi.
Sot sondaı-aq osy aıdyń ishinde ananyń ÁQBtK-niń 127-babynyń 1-bóligi boıynsha jaýapkershilikke tartylǵanyn anyqtady.
Sotta áıel kinásin tolyq moıyndap, kámeletke tolmaǵan balalarynyń kózinshe jubaıymen birge spırttik ishimdik ishkenin rastady.
ÁQBtK-niń 127-babynyń 2-bóliginiń sanksıasy 15 aılyq eseptik kórsetkish mólsherinde aıyppul salýdy ne 5 táýlikke deıingi merzimge ákimshilik qamaýǵa alýdy kózdeıdi.
Sot kináni moıyndaý men kámeletke tolmaǵan balalardyń bolýyn jaýapkershilikti jeńildetetin mán-jaılar dep tanydy.
Sot qaýlysymen áıel ÁQBtK-niń 127-babynyń 2-bóligi boıynsha kináli dep tanylyp, oǵan 15 aılyq eseptik kórsetkish (64 875 teńge) mólsherinde aıyppul salyndy.
Qaýly zańdy kúshine endi.