Jambyl oblysynda TikTok-ta «Altyn qyz» degen atpen tanymal 41 jastaǵy áıel áleýmettik jelidegi tikeleı efırlerden keıin psıhıkalyq densaýlyq ortalyǵyna jetkizildi, dep habarlaıdy infohub.kz saıty.
Jambyl oblysy polısıa departamenti Instagram-daǵy paraqshasynda Baızaq aýdanynyń turǵyny tikeleı efırlerde balaǵat sózder qoldanǵany úshin birneshe ret ákimshilik jaýapkershilikke tartylǵanyn habarlady.
«Birneshe ret eskertýlerge, profılaktıkalyq jumystarǵa qaramastan, áıel osyndaı áreketterin jalǵastyrdy, sonyń ishinde kámeletke tolmaǵan balalaryna qatysty balaǵat sózder aıtty», — dep atap ótti polısıada.
Polısıa qyzmetkerleri, qorǵanshylyq organdary jáne basqa da múddeli qyzmetter osy otbasyndaǵy balalardyń turý jáne tárbıeleý jaǵdaılaryna tekserý júrgizdi. «Jedel járdem brıgadasynyń qaraýynan keıin Kasymova Laılo emdelý úshin Jambyl oblystyq psıhıkalyq densaýlyq ortalyǵyna jatqyzyldy», — dep qosty oblystyq PD.
Polısıa málimetinshe, qazir balalar ákesiniń qaraýynda.