Qazaqstan Prezıdenti Qasym-Jomart Toqaev Qazaqstannyń halyq jazýshysy Valerı Mıhaılovty 80 jasqa tolýymen quttyqtap, oǵan arnaıy jedelhat joldady, dep habarlaıdy infohub.kz saıty.
Memleket basshysy mereıtoı ıesiniń tabıǵı daryny men sırek kezdesetin eńbekqorlyǵy onyń úlken ári tabysty shyǵarmashylyq jolynyń negizi bolǵanyn atap ótti. Valerı Mıhaılov kóp jyldar boıy elimizdiń bedeldi basylymdarynda jemisti eńbek etip, «Qazaqstanskaıa pravda» gazeti men «Prostor» jýrnalyn basqardy. Prezıdenttiń aıtýynsha, ol joǵary adamgershilik qasıetteri men berik ómirlik ustanymdarynyń arqasynda áriptesteri men búkil qoǵamnyń shynaıy qurmetine bólendi.
Qasym-Jomart Toqaev Valerı Mıhaılovtyń shyǵarmalary birneshe urpaq oqyrmandarynyń laıyqty qyzyǵýshylyǵyna ıe bolyp, elimizdiń ádebı murasynyń ajyramas bóligine aınalǵanyn da atap ótti.
Sonymen qatar, Prezıdent jazýshyny otandyq ádebıettiń damýyna qosqan erekshe úlesi úshin «Barys» ordeniniń I dárejesimen marapattaý týraly jarlyqqa qol qoıdy.
Valerı Mıhaılov — aqyn, jazýshy, pýblısıs, «Uly jut shejiresi» derekti povesiniń avtory.