Qazaqstan Prezıdenti Qasym-Jomart Toqaev Ustazdar kúnine arnalǵan saltanatty sharaǵa qatysýshylardy quttyqtap, pedagogterdi qoldaýdyń jańa sharalary, olardyń biliktiligin arttyrý jáne mektepterge jasandy ıntellektti engizý týraly aıtyp berdi, dep habarlaıdy infohub.kz saıty.
Memleket basshysy atap ótkendeı, bıyl pedagogıkalyq mamandyqtar boıynsha memlekettik grantty 12 myńnan astam túlek ıelendi. «Altyn belgi» belgisiniń 2 myńnan astam ıegeri pedagogıkalyq mamandyqtar boıynsha memlekettik grantqa qol jetkizdi. Al ustazdyq joldy tańdaǵan stýdentterdiń stıpendıasy 2,5 ese ósti.
«Jańa oqý jylynyń qarsańynda óńirlerde 15 myńnan astam muǵalim jumysqa ornalastyryldy, olardyń jartysy — jas mamandar. Bul mektepterge bilimdi, jigerli ári ozyq oıly ustazdardyń jańa býyny kele jatqanyn bildiredi. Tájirıbeli pedagogter óz jolynda alǵashqy qadamdaryn jasap jatqan jas áriptesterine jan-jaqty qoldaý kórsetýi kerek. Bul naǵyz kásibı sheberlerdi tárbıeleýge múmkindik berip, kásibı sabaqtastyq dástúrin qalyptastyrady. Bilim berý salasynyń kadrlyq áleýetin nyǵaıtýdy jalǵastyrýymyz qajet. Asyra aıtpaı-aq, myqty memlekettiń irgetasy — bilikti pedagogter dep aıtýǵa bolady. Al olardy daıarlaýda joǵary oqý oryndarynyń alatyn orny erekshe. Bolashaq mamannyń kásibı bilimi men daǵdysy ýnıversıtet qabyrǵasynda qalyptasady. Ǵylymı-bilim berý salasyndaǵy halyqaralyq yntymaqtastyqty da jandandyrý mańyzdy. Shetelge jasaǵan saparlarymda álemniń jetekshi oqý oryndarymen seriktestikti nyǵaıtýǵa únemi erekshe kóńil bólemin», — dedi Qasym-Jomart Toqaev.
Memleket basshysy atap ótkendeı, jahandyq sıfrlyq órkenıet pen bilim ekonomıkasy dáýirinde ómir súrip, eńbek etetin azamattar býynyn tárbıeleý — aýqymdy mindet.
«Sondyqtan meniń tapsyrmammen orta bilim júıesine jasandy ıntellektti kezeń-kezeńimen engizý bastaldy. Jańa tehnologıalar saýatty paıdalanylsa, pedagogıkalyq qyzmetti aıtarlyqtaı jeńildetip, kúndelikti qaǵazbastylyqtan aryltatyn senimdi quralǵa aınalady. Muǵalimderdiń tálimgerlikke jáne oqýshylarmen tikeleı jumysqa kóbirek ýaqyty bolýy tıis. Bul baǵytta mańyzdy qadam jasaldy. Bıyl qyrkúıekte Oqý-aǵartý mınıstrligi bilim berýde jasandy ıntellektti qoldaný standartyn bekitti. Ozyq ádistemeler men sıfrlyq platformalarǵa elimizdiń barlyq mektebi — megapolıste me, álde shalǵaı aýylda ma — qol jetkizedi. İrgetasymyz myqty, jumys durys baǵytta bastaldy. PISA-2025 halyqaralyq zertteýiniń nátıjeleri kórsetkendeı, sıfrlyq daıyndyq deńgeıi boıynsha mektepterimiz EYDU-ǵa múshe memleketterdiń ortasha kórsetkishinen ozyp tur. Oqýshylardyń kognıtıvtik beıimdelý ındeksi de ortasha deńgeıden joǵary. Biraq bul — tek bastapqy núkte, ózimizdi tynyshtandyratyn sebep emes. Alda áli aýqymdy jumys kútip tur. Sondyqtan qol jetken jetistikke toqmeıilsýge áste bolmaıdy», — dedi prezıdent.
Eske salaıyq, búgin Qasym-Jomart Toqaev óz rezıdensıasynda ótken saltanatty sharaǵa qatysýshylardy Ustazdar kúnimen quttyqtady.