Aralas jekpe-jek (MMA) sheberi, brıtandyq Tom Aspınall UFC-diń aýyr salmaqtaǵy beldiginen bas tartqanyn habarlady, dep jazady infohub.kz saıty.
33 jastaǵy sportshy 2025 jyly amerıkalyq Djon Djons mansabyn aıaqtaǵan soń aýyr salmaqtaǵy (120,2 kg-ǵa deıin) tolyqqandy chempıon atandy. Buǵan deıin Aspınall ýaqytsha beldikti ıelengen edi.
Brıtanıalyq sportshy tolyqqandy tıtýldy alǵash ret 2025 jyldyń qazanynda qorǵady. Fransýz Sırıl Ganmen jekpe-jek ótpeı qaldy: kózine saýsaq tıgen soń Aspınall jekpe-jekti jalǵastyra almady.
Sodan beri ol emdelýden ótti, alaıda qalpyna kelý uzaqqa sozyldy. Densaýlyǵyna baılanysty beldikti bos qaldyrdy.
«Kóz máselesiniń jalǵasýyna baılanysty jekpe-jekke qatysýǵa medısınalyq ruqsat ala almaımyn. Birneshe ota jasalyp, ınfeksıa da boldy, biraq qaıtý úshin qolymnan kelgenniń bárin jasadym», — dedi Aspınall.
Ol buǵan deıin jekpe-jek kúnin keliskenin, alaıda qyrkúıekte sparrıngte kózin qaıta jaraqattaǵanyn atap ótti. Endi sportshy oktagonǵa qashan oralatynyn bilmeıdi.
«Endi men aýyr salmaqtaǵy tıtýldan bas tartýǵa sheshim qabyldadym. UFC-den osy málimdeme jasaýǵa ruqsat suradym, óıtkeni dıvızıondy tejegim kelmeıdi. Mansaptyń toqtap qalýy qandaı bolatynyn bilemin jáne basqa da sportshylardyń tıtýl úshin synǵa túsýin qalaımyn», — dep jazdy Aspınall.
Sportshy oktagonǵa tezirek oralý ústinde jumysyn jalǵastyryp jatqanyn aıtyp, «osynaý qorqynyshty kezeńde» qoldaý kórsetkenderdiń bárine alǵys bildirdi.
Osylaısha, UFC-diń aýyr salmaqtaǵy tolyqqandy chempıony Gan bolady. Fransýz ýaqytsha beldikti maýsymda brazılıalyq Aleks Pereırany nokaýtqa túsirip jeńip alǵan edi.