2026 jylǵy tamyzda Qazaqstan bankteri 213,4 mlrd teńge taza paıda tapty. Bul ótken aıdyń nátıjesinen 6%-ǵa artyq. Tabys kólemi boıynsha Halyk Bank pen Kaspi Bank kósh bastap tur, al eń paıdaly bestikke ForteBank qaıta oraldy. Mundaı derekti Ulttyq bank jarıalady, dep habarlaıdy infohub.kz saıty.
Aılyq paıda kólemi boıynsha birinshi oryndy Halyk Bank ustap otyr. Tamyzda bank 76,2 mlrd teńge tapty, bul shildedegi nátıjeden 1%-ǵa, ıaǵnı 0,6 mlrd teńgege kóp. Halyk-tiń jyl basynan bergi taza paıdasy 615,3 mlrd teńgege jetti.
Ekinshi orynda Kaspi Bank qaldy: tamyzdaǵy taza paıdasy 41,8 mlrd teńge. Shildemen salystyrǵanda kórsetkish 2%-ǵa, ıaǵnı 0,6 mlrd teńgege ósti. 2026 jyldyń basynan beri bank 309,8 mlrd teńge tapty.
Úshinshi satyny Bank SentrKredıt saqtap qaldy. Onyń aılyq taza paıdasy 19%-ǵa — 16,4 mlrd teńgeden 19,5 mlrd teńgege deıin ósti. BSK-niń segiz aıdaǵy jıyntyq nátıjesi 142,5 mlrd teńgege jetti.
Tórtinshi oryndy Otbasy bank aldy: tamyzda ol 15 mlrd teńge taza paıda tapty. Bul shildege qaraǵanda 10%-ǵa, ıaǵnı 1,4 mlrd teńgege kóp. Jyl basynan beri banktiń paıdasy 115 mlrd teńge boldy.
Eń basty ózgeris besinshi orynda boldy. Shildede eń paıdaly bestikten shyǵyp, ornyn Freedom Bank-ke bergen ForteBank qaıta oraldy. Tamyzda Forte 13,6 mlrd teńge tapty, al bir aı buryn bul kórsetkish 4,8 mlrd teńge edi. Osylaısha, banktiń aılyq paıdasy 183%-ǵa, ıaǵnı 8,8 mlrd teńgege ósti. Jyl basynan beri Forte 87,4 mlrd teńge taza paıda aldy.
Tamyzda alǵashqy bestiktiń artynda Sıtıbank — 9,5 mlrd teńge, Alatau City Bank — 6,1 mlrd teńge, Home Credit Bank — 4,1 mlrd teńge, Bank RBK — 4 mlrd teńge jáne VTB — 3,5 mlrd teńge paıdamen tur.
Shildede kóshbasshylar bestigi bylaı kóringen: Halyk Bank — 75,6 mlrd teńge, Kaspi Bank — 41,2 mlrd teńge, Bank SentrKredıt — 16,4 mlrd teńge, Otbasy bank — 13,6 mlrd teńge, Freedom Bank — 9,6 mlrd teńge.