Japonıada ótip jatqan 2026 jylǵy jazǵy Azıa oıyndarynda Qazaqstan ulttyq quramasy sapynda altyn medal jeńip alǵan boksshy Tórehan Sabyrhan jeńisi týraly pikir bildirdi, dep habarlaıdy infohub.kz saıty.
Ulttyq olımpıada komıtetiniń saıtynda jarıalanǵan suhbatynda chempıon bul jarysqa óte jaqsy daıyndalǵanyn jáne altyn medaldi birinshi bolyp jeńip alǵanyna qýanyshty ekenin aıtty. Onyń sózinshe, bul — álem chempıonatynan keıingi ol men aǵasynyń úlken armany edi. Bul joly olar birge altyn ala almady, biraq sportshy bolashaqta bul maqsatqa mindetti túrde jetetinine senedi.
Sabyrhan fınaldaǵy qarsylasyna arnaıy daıyndalǵanyn, óıtkeni Azıa chempıonatyndaǵy jeńilisi úshin qaryz qaıtarǵysy kelgenin atap ótti. «Sońynda bári sátti boldy, onymen esep aıyrysa aldym. Qarsylastyń buǵan deıingi jekpe-jekterin zerttep, taktıkany aldyn ala ázirledik. Josparymyzdy tamasha oryndaı aldym», — dedi boksshy.
Ol sondaı-aq Azıa chempıonatynda taktıkany durys tańdamaı, qarsylastyń soqqylaryn ótkizip alǵanyn túsindirdi. Bul joly asyqpaýǵa, qarsylasqa shabýyl jasaýǵa múmkindik bermeýge jáne qashyqtyqty durys baqylaýǵa tyrysty.
Tórehan alǵashqy eki raýndta basym bolǵanyn, úshinshi raýndta da qarqyndy tómendetpeı, batyl áreket etkenin naqtylady. Ol qarsylasyn qajytyp, óz maqsatyna jetti. Bul joly ol «qazaq boksshylary qaryz qaıtara alady» degendi dáleldegisi keldi.
«Aldaǵy basty maqsatymyz — Astanada ótetin álem chempıonaty. Osy týrnırge daıyndalamyz. Bul joly aǵam ekeýmiz Azıa oıyndarynda altyn ala almadyq. Endi álem chempıonatynda armanymyzdy júzege asyrýǵa tyrysamyz. Sonymen qatar, Olımpıada oıyndary da alda. Búkil Qazaqstanǵa úlken alǵys aıtqym keledi. Jankúıerler áleýmettik jelilerde qoldaý kórsetip, jyly lebizderin jazyp jatyr. Qoldaý úshin barlyǵyna kóp rahmet», — dep qorytyndylady Tórehan Sabyrhan.
Aıta keteıik, Tórehannyń aǵasy — boksshy Mahmud Sabyrhan jazǵy Azıa oıyndarynyń qola medalin jeńip aldy. 55 kelige deıingi salmaq dárejesindegi jartylaı fınalda ol fılıppındik Karlo Paalammen kezdesti.