Japonıada ótip jatqan Azıada-2026 oıyndarynda Qazaqstannyń trıatlon quramasy aralas estafetada jetinshi bolyp márege jetti. Ulttyq komanda sapynda Dıana Erjanova, Egor Krýpákov, Aıda Kım jáne Aıan Beısenbaev synǵa tústi, dep habarlaıdy infohub.kz saıty.
Qazaqstandyq tórttik qashyqtyqty 1 saǵat 31 mınýt 45 sekýndta baǵyndyryp, jeńimpazdardan 5 mınýt 51 sekýndqa qalyp qoıdy.
Altyn medaldy Qytaı quramasy 1:25:54 nátıjesimen jeńip aldy. Ekinshi oryndy Japonıa enshiledi – 1:26:45, qola Gonkong komandasyna buıyrdy – 1:27:25.
Aralas estafetada tórt qatysýshynyń árqaısysy óz kezeńin júzip ótedi: 300 metr júzý, 6,6 shaqyrym velojarys jáne 2 shaqyrym júgirý. Jarys japondyq Gamagorı qalasynda ótti.
Bir kún buryn Arlan Janabaı erler arasyndaǵy jeke trıatlonda qola júldeger atanyp, Qazaqstanǵa Azıada-2026 oıyndaryndaǵy alǵashqy medalin syılady. Al Dıana Erjanova áıelder jarysynda 17-orynǵa turaqtady.
Japonıadaǵy XX jazǵy Azıa oıyndary resmı túrde 19 qyrkúıekte ashyldy. 45 eldiń sportshylary qatysatyn jarystarda 460 medal jıyntyǵy sarapqa salynady: 217-si – erler, 204-i – áıelder, 39-y – aralas razrádtar arasynda. Týrnırler 41 sport túriniń 68 dısıplınasynda ótedi.
Azıada-2026 oıyndarynda Qazaqstan quramasynyń namysyn 559 sportshy qorǵaıdy. Kúni keshe qazaqstandyqtar tórt altyn medal jeńip alǵan bolatyn. Oıyndar chempıondary atanǵandar: veloshabandozdar Rınata Sýltanova men Alekseı Lýsenko, sondaı-aq karateshiler Jolaman Bıgabyl men Sofá Berýlseva.