Eýropalyq fýtbol qaýymdastyqtary odaǵynyń (ÝEFA) atqarý komıteti 2028 jylǵy ÝEFA Sýperkýbogin ótkizetin oryn retinde «Astana Arenany» tańdady. Sheshim 15 qyrkúıekte Salonıkıde ótken atqarý komıtetiniń otyrysynda qabyldandy. Qazaqstan tarıhta alǵash ret osy kýbok úshin ótetin machty qabyldaıdy, dep habarlaıdy infohub.kz saıty.
Aıta keteıik, 2027 jyly kezdesý Amsterdamdaǵy «Iohan Kroıf Arenada» ótedi, al bir jyldan keıin kýbok Qazaqstan astanasynda sarapqa salynady.
Sýperkýbok dástúrli túrde eýropalyq klýbtyq týrnırlerdiń jańa maýsymyn ashady. Bir machta ótken maýsymnyń Chempıondar lıgasy men Eýropa lıgasynyń jeńimpazdary kezdesedi. 2013 jyldan bastap kezdesý orny jyl saıyn aýysyp otyrady.
ÝEFA Sýperkýbogi-2028diń naqty kúni ázirge jarıalanǵan joq.
ÝEFA atqarý komıtetiniń otyrysynda basqa da eýropalyq fınaldardyń ıeleri anyqtaldy. Chempıondar lıgasynyń 2028 jylǵy fınaly Múnhende ótedi, al 2029 jyly sheshýshi machty Barselonadaǵy «Kamp Noý» qabyldaıdy. Eýropa lıgasynyń fınaldary osy jyldary sáıkesinshe Býharest pen Belgradta ótedi.
«Astana Arena» 2009 jyly ashylǵan jáne shamamen 30 myń kórermendi syıdyrady. Stadıon jyljymaly shatyrmen jabdyqtalǵan, «Astana» fýtbol klýbynyń úı arenasy sanalady, sondaı-aq Qazaqstan quramasynyń machtaryn qabyldaıdy. Onda Chempıondar lıgasy men Eýropa lıgasynyń kezdesýleri birneshe ret ótken.
Sońǵy ÝEFA Sýperkýbogi 2026 jyldyń tamyzynda Zalsbýrgte ótti. «PSJ» «Aston Vıllany» 2:1 esebimen jeńip, kýbokty ekinshi jyl qatarynan ıelendi.