Astanada qaıtys bolǵan jedel járdem feldsheri Ýldana Myrzýannyń anasy Salıma Omarova sot otyrysynda jesirdiń otbasy as berýge jáne nesıeni jabýǵa berilgen 4,5 mıllıon teńgeni qaıtarýdy talap etkenin aıtty, dep habarlaıdy infohub.kz saıty.
Otyrys barysynda Salıma Omarova aldymen sottalýshyǵa qatysty jaza sharasy týraly suraqqa jaýap berdi. «Men eshkimdi kinásiz jazalaýdy suramaımyn, bul isti sottyń qaraýyna qaldyramyn», — dedi ol.
Ol sondaı-aq Ýldananyń nesıesi bolǵanyn, biraq ony qyz qaıtys bolǵannan keıin alty aı ótken soń ǵana óteýge bolatynyn otbasy bilgenin aıtty. «Úlken qyzym Adıletten as berýge aqsha surady, mamyr aıynda Ýldananyń nesıesin ózim óteımin dep túsindirdi. Densaýlyǵyma baılanysty men ózim jumys istemeımin. Bul qarajat as berýge jáne eskertkish ornatýǵa jumsaldy», — dep túsindirdi anasy.
Mamyr aıynda Adılettiń anasy qońyraý shalyp: «Siz 4,5 mln aldyńyz», — dep, ony qaıtarýdy ótingen. «Qaıtarmasańyz, sotqa beremiz», — dep onyń sózin keltirdi Salıma Omarova.
Adılet Zeıneldiń jábirlenýshi dep tanylǵanyn ol qańtar nemese aqpan aıynda bilgen. «Sáýirde kelip, tergeý qalaı júrip jatqanyn jáne meniń jábirlenýshi bola alatynymdy suradym. Úıge kelgen soń oılanyp, anasy retinde nege men jábirlenýshi bolmasqa dep sheshtim. Qyzymnyń beıitine baryp, onda eskertkish te joq ekenin kórdim, ol beımálim, esimi joq adamdaı», — dep qosty qaıtys bolǵan qyzdyń anasy.
Salıma Omarova munyń ony qatty renjitkenin, qyzy jetim sıaqty bolyp kóringenin moıyndady. «Men oılanyp, tergeý barysyn baqylaýdy jón kórdim — maqsatym eshkimdi aıyptaý emes, bundaı jaǵdaıdyń qaıtalanbaýy jáne mundaı qaıǵynyń basqa bireýge de bolmaýy. Men eshkimdi aıyptamaq emespin», — dep atap ótti ol.
Adılet Zeıneldiń advokaty as berýge jumsalǵan chekter men túbirtekter týraly surady, biraq Omarova aýylda chek berilmeıtinin, otbasy aýdarym nemese qolma-qol aqshamen esepteskenin aıtty. «Men búginge deıin syılastyq tanytyp, ony "qudaǵı" dep ataımyn, men odan aqshany qaıtarýdy talap etetinin kútpedim — bul meni qatty renjitti. Bul aqsha qyzymnyń nesıesin óteýge arnalǵan edi», — dep qorytyndylady Omarova.