Ulttyq bank tóraǵasynyń orynbasary Álıa Moldabekova Joǵary aýdıt palatasynyń (JAP) nusqaýyn oryndamaǵany úshin 64 875 teńge aıyppulǵa tartyldy. JAP altyn-valúta aktıvterin basqarýǵa qatysy joq qyzmetkerlerge tólengen syıaqylardy búdjetke qaıtarýdy talap etken. Ulttyq bank nusqaýdy oryndaý sharalaryn qabyldap jatqanyn, biraq tekserý málimetteriniń qupıalylyǵyna baılanysty tolyq aqparat bermeıtinin habarlady, dep habarlaıdy infohub.kz saıty.
Janjal 2025 jyldyń jeltoqsanynda bastalyp, JAP Ulttyq bankten 1 sáýirge deıin altyn-valúta aktıvterin basqarmaıtyn qyzmetkerlerge berilgen syıaqylardy qaıtarýdy talap etken. Alaıda bul tólemderdi qaıtaryp alý zańdy turǵydan qıynǵa soqqan: banktegiler syıaqylar ishki erejeler boıynsha eseptelgenin, al Azamattyq kodekske sáıkes qyzmetkerlerdiń adal áreketteri kezinde mundaı somalardy qaıtarý múmkin emes ekenin túsindirgen. Jalaqydan ustap qalý tek sot arqyly júzege asyrylady, biraq merzimniń ótýine baılanysty sottar odan bas tartýy yqtımal edi.
Nusqaýdyń ýaqtyly oryndalmaýy saldarynan Ulttyq bank tóraǵasynyń orynbasary Álıa Moldabekovaǵa qatysty ákimshilik hattama toltyryldy. Sotta ol isti toqtatýdy surap, jaǵdaıdyń zańdy tuıyqqa tirelgenin aıtqanymen, sot aýdıtorlardyń jaǵyn qoldap, 64 875 teńge kóleminde aıyppul saldy.
Retteýshiniń baspasóz qyzmeti nusqaýdyń tolyq málimetterin jarıalaı almaıtynyn, óıtkeni aýdıt nátıjelerinde qupıa jáne jeke derekter bar ekenin jetkizdi. «Qazirgi ýaqytta 2026 jylǵy 29 maýsymdaǵy Mamandandyrylǵan aýdanaralyq ákimshilik quqyq buzýshylyq týraly is boıynsha sot qaýlysy zańdy kúshine engen joq. Ýákiletti organdardyń aktilerin oryndaý mindettiligi qaǵıdatyn basshylyqqa ala otyryp, Ulttyq bank nusqaýdy oryndaýǵa baǵyttalǵan barlyq qajetti sharalardy qabyldaıdy», — dep atap ótti uıymda. Vedomstvo ýákiletti organdardyń talaptaryn oryndaıtynyn jáne bolashaqta mundaı jaǵdaılardy boldyrmaý úshin ishki erejelerdi qaıta qarap jatqanyn jetkizdi.