Brıfıńte Ulttyq bank tóraǵasy Tımýr Súleımenov azamattardyń nege teńgege senýi kerektigin túsindirdi, dep habarlaıdy infohub.kz.
Jýrnalıser Qazaqstannyń depozıtterge kepildik berý qorynyń derekterine nazar aýdaryp, halyqtyń áli de 5,9 trln teńgeni shetel valútasynda saqtap otyrǵanyn aıtty. Olar bul salymshylardyń kim ekenin surady.
Tımýr Súleımenov jeke tulǵalardyń depozıtteriniń jalpy kólemi shamamen 30 trln teńgeni quraıtynyn, al zańdy tulǵalardyń qarajatyn qosqanda 46–47 trln teńgege jetetinin atap ótti. «Bul óte jaqsy kórsetkish, depozıtterimiz ósip keledi», — dedi ol.
Onyń aıtýynsha, depozıtterdiń dollarlanýy tarıhı tómen deńgeıde — shamamen 19%. Áli 3–4 jyl buryn bul kórsetkish 30–35% bolsa, 5–6 jyl buryn 60% edi. «Iaǵnı, teńgege degen senim jyl saıyn artyp keledi», — dep qosty Ulttyq bank basshysy.
Valútalyq salymdardy ustaýshylar týraly suraqqa Súleımenov: «Negizinen bul joǵary tabysty azamattar, olardyń teńgede de jınaqtary bar, árıne, biraq dıversıfıkasıa turǵysynan olar dollarda saqtaýdy jón kórgen», — dep túsindirdi.
Ol sondaı-aq Ulttyq banktiń olardy májbúrlep teńgege aýdarý jospary joq ekenin aıtty. «Muny isteý qıyn bolady. Qarańyzshy, eger siz dollarǵa salsańyz, depozıtten 1% tabys taptyńyz. Teńgelik depozıtterdiń mólsherlemesi joǵary, tıisinshe, qarapaıym qarjylyq matematıka jumys istemese, olar óz jınaqtaryna ózderi jaýapty shyǵar», — dedi Súleımenov.
Retteýshi basshysy dollardy 550 teńgeden satyp alǵandardyń qazir baǵam aıyrmashylyǵynan da, teńgelik salymdardan túsken paıdany jiberip alýdan da shyǵynǵa ushyrap jatqanyn eske saldy. «Teńgege sený kerek», — dep túıindedi ol.