AQSH-tyń ashyq tenıs chempıonatynda — «Úlken dýlyǵa» serıasynyń maýsymdy qorytyndylaıtyn týrnırinde — jekeleı synda shırek fınalǵa shyqqandardyń barlyǵy anyqtaldy. Qazaqstandyq tenısshi Elena Rybakına týrnır qorytyndysy boıynsha álemdik reıtıńte kósh bastaýǵa naqty múmkindigi bar, dep habarlaıdy infohub.kz saıty.
Tarıhı nátıjege jetý úshin bizdiń sportshynyń eki joly bar. Birinshisi — shırek fınalda reıtıńtiń 121-satysynda turǵan qytaılyq Chjen Sınvendi utý. Bul jaǵdaıda Rybakına basqa machtardyń nátıjesine qaramastan álemniń birinshi raketkasy atanady. Synyp aıyrmashylyǵyn jáne Elenanyń qarsylasymen bes kezdesýiniń tórteýinde jeńiske jetkenin eskersek, bul nusqa ábden múmkin bolyp kórinedi.
Degenmen, tosynsyılardy da esten shyǵarmaý kerek: júıkesiniń álsireýi, qazaqstandyq Sınsınnatıdegi týrnırdi aıaqtaı almaı, US Open-te juptyq synnan bas tartýyna sebep bolǵan jaraqatynyń asqynýy nemese qarsylastyń keremet shabyty.
Aıtpaqshy, Chjen Sınven qarapaıym reıtıńine qaramastan, shırek fınalǵa deıingi jolda polák Iga Sventekten (8) — 7:5, 6:3, amerıkandyq Medıson Kızden (24) — 1:6, 7:6 (7:3), 7:5, sondaı-aq bizdiń Iýlıa Pýtınsevadan (84) — 6:4, 2:6, 6:1 esebimen basym tústi. Ár mach saıyn qytaılyq qyz óz deńgeıin kóterip keledi, sondyqtan Rybakınaǵa jeńil serýen bolmaıdy.
Eger Elena jeńilse de, kelesi dúısenbide WTA reıtıńinde birinshi orynǵa shyǵa alady, biraq bul úshin US Open-2026 tıtýlyn kelesi tórttiktiń biri: Chjen Sınven, Mırra Andreeva (Reseı, 5), Lında Noskova (Chehıa, 6) nemese Emma Navarro (AQSh, 27) jeńip alýy kerek. 19 jastaǵy reseılik, «Rolan Garros-2026» chempıony, basty favorıt bolyp kórinedi, degenmen Ýımbldon-2026 jeńimpazy cheh qyzynyń bul týraly óz pikiri bolýy múmkin.
Chjen Sınvenmen mach Elena úshin meıdjorlardaǵy jekeleı synda segizinshi shırek fınal bolady. Bir qyzyǵy, ol bir ret juptyq synda da osy kezeńge jetken — «Rolan Garros-2021»-de reseılik Anastasıa Pavlúchenkovamen birge. Aıtpaqshy, dál sol týrnırde qazaqstandyq jup Aleksandr Býblık/Andreı Golýbev fınalǵa deıin jetken bolatyn.
Bıylǵy maýsymda Rybakına WTA jáne «Úlken dýlyǵa» týrnırleriniń shırek fınalynda on ret oınap, bes jeńiske jetip, bes ret utylǵan.
Erler arasyndaǵy jekeleı synda, shamasy, álemdik reıtıńtiń ekinshi jáne úshinshi nómirleri — nemis Aleksandr Zverev pen ıspandyq Karlos Alkaras arasynda fınal ótýi ábden múmkin. Álemniń birinshi raketkasy Iannık Sınner jaraqatyna baılanysty Nú-Iorkke kelmedi. Bizdiń Aleksandr Býblık, ókinishke qaraı, úshinshi aınalymnan ári óte almady.
AQSH-tyń ashyq chempıonaty — hardta ótetin «Úlken dýlyǵanyń» jyl saıynǵy týrnıri, kúntizbelik jyldaǵy sońǵysy. Onyń júlde qory meıdjorlar úshin rekordtyq 108 mıllıon dollardy quraıdy. 1978 jyldan beri jarystar Nú-Iorktegi Bıllı Djın Kıng atyndaǵy Ulttyq tenıs ortalyǵynda ótedi.
Qazirgi chempıon — Karlos Alkaras, ol byltyrǵy fınalda Sınnerdi utqan bolatyn. Ispanıalyq bıylǵy týrnırdiń shırek fınalyna shyǵyp, amerıkandyq Tommı Poldy (21) 6:4, 6:3, 6:4 esebimen jeńdi.
Áıelder arasynda 2025 jyly Arına Sobolenko jeńiske jetken, ol sheshýshi machta amerıkandyq Amanda Anısımovany utqan. Belarýs sportshysy da 2026 jylǵy shırek fınalǵa shyǵyp, Teılor Taýnsendti (96) — 6:4, 6:3 esebimen tize búktirdi.