Qytaıdyń Tánszın qalasynda áıelder arasyndaǵy voleıboldan Azıa chempıonatynyń 23-shi jarysy bastaldy. Bul dodaǵa Qazaqstan quramasy da qatysyp jatyr, dep habarlaıdy infohub.kz saıty.
Azıanyń on eki ulttyq quramasy bas júldeni sarapqa salady. Chempıon atanǵandar 2028 jyly Los-Andjeleste ótetin Olımpıada oıyndaryna joldama alady, al júldegerler 2027 jyly Kanada men AQSH-ta ótetin álem chempıonatyna qatysýǵa múmkindik alady.
Toptyq kezeńde Qazaqstan quramasy V tobynda Taıland, Indonezıa jáne Avstralıa quramalarymen birge oınaıdy. A tobynda Qytaı, Iran, Qytaı Taıbeıi jáne Irak, al S tobynda Japonıa, Vetnam, Ońtústik Koreıa jáne Gonkong óner kórsetedi. Shırek fınalǵa ár toptan eki úzdik komanda, sondaı-aq úshinshi oryn alǵan eń úzdik eki qurama shyǵady.
Týrnırdiń alǵashqy oıynynda A tobyndaǵy ırandyq voleıbolshylar Qytaı Taıbeıi quramasyn 3:1 esebimen jeńdi. Qazaqstan quramasy alǵashqy oıynyn erteń Indonezıaǵa qarsy ótkizedi. Fılıppınde ótken Azıa ulttary kýbogynda qazaqstandyq qyzdar tórtinshi oryn alǵan bolatyn, sol jarysta olar ındonezıalyqtardy 3:0 esebimen utqan edi.
23 tamyzda Asqar Shákibekov shákirtteri avstralıalyqtarmen, al 25-inde taılandtyqtarmen oınaıdy.
Áıelder arasyndaǵy voleıboldan tuńǵysh Azıa chempıonaty 1975 jyly Melbýrnde ótken bolatyn. 22 týrnır boıy júldeli oryndardy Qytaı, Japonıa, Taıland jáne Ońtústik Koreıa quramalary bólisken, biraq bir ret olardyń arasyna Qazaqstan kirdi. 2005 jyly qazaqstandyq voleıbolshylar fınalda qytaılyqtardan 0:3 esebimen jeńilip, kúmis júldeni ıelendi.
Budan keıin de, buǵan deıin de qazaqstandyqtar kontınenttik dodada besinshi orynnan joǵary kóterilgen emes. Taılandta ótken ótken Azıa chempıonatynda da olar besinshi orynǵa turaqtaǵan edi. Sol jarysta taılandtyqtar qatarynan úshinshi ret chempıon atandy, kúmis Qytaıǵa, qola Japonıaǵa buıyrdy.