Qazaqstan áıelder voleıbol quramasy Japonıadaǵy Azıa oıyndaryndaǵy ónerin tórtinshi jeńilispen támamdady. Qytaı, Ońtústik Koreıa jáne Qytaı Taıbeıi komandalarynan keıin qazaqstandyqtar jetinshi oryn úshin machta bir saǵattan sál astam ýaqyt ishinde Vetnamǵa ese jiberdi — 0:3 (21:25, 19:25, 15:25), dep habarlaıdy infohub.kz saıty.
Maýsymda Fılıppınde ótken Azıa ulttary kýbogynda Asqar Shalqıbekov shákirtteri vetnamdyqtardy toptyq kezeńde 3:2 esebimen utqan edi, alaıda qola júlde úshin talasta olarǵa 0:3 esebimen jol berdi.
Bul joly da qazaqstandyqtar Vetnamdy tize búktire almady. Bizdiń voleıbolshylardyń oıynyndaǵy jarqyn tustar kóptegen qateliktermen almasyp jatty. Sheshýshi sátterde Qazaqstan quramasy qarsylastaryna únemi jol berip otyrdy, bul qorytyndy nátıjeden de kórinis tapty.
Bastapqy oıynda Fılıppındy jeńý qazaqstandyq komanda úshin týrnırdegi jalǵyz jeńis bolyp qaldy. Vetnamǵa ese jiberip, Qazaqstan quramasy qatarynan ekinshi Azıadany segizinshi orynmen aıaqtady. Bizdiń voleıbolshylardyń qurlyqtyq oıyndardaǵy eń úzdik nátıjesi áli kúnge Gýanchjoýdaǵy Azıada-2010-nyń qolasy bolyp tur.
AZIA OIYNDARY-2026. Voleıbol. Áıelder. 22 qyrkúıek. 7-oryn úshin mach. QAZAQSTAN – VETNAM 0:3.
Azıada-2026-nyń altyn medalin búgin Japonıa men Qytaı sarapqa salady. Qola júlde úshin Ońtústik Koreıa men Taıland talasady.
Oıyndardyń resmı ashylýy 19 qyrkúıekte ótti. 45 eldiń sportshylary qatysatyn keshendi jarystarda 460 medal jıyntyǵy sarapqa salynady: 217-si — erler arasynda, 204-i — áıelder arasynda jáne 39-y — aralas razrádtarda. Azıada-2026-da Qazaqstan quramasynyń sapynda 35 sport túrinen 558 sportshy óner kórsetedi.
Oıyndardyń birinshi kúni qazaqstandyqtar tórt altyn medal jeńip aldy. Oıyndar chempıondary atanǵandar: veloshabandozdar Rınata Sultanova men Alekseı Lýsenko, sondaı-aq karateshiler Jolaman Bıgabyl men Sofá Berýlseva. Ekinshi kúnnen keıin Qazaqstan beıresmı medal esebinde tórtinshi orynda turdy.