Mańǵystaý oblysyndaǵy Ybyqty saı tabıǵı eskertkishinde vandalızmniń kezekti oqıǵasy tirkeldi. Osy fakti boıynsha qylmystyq is qozǵalyp, kúdikti ustaldy, dep habarlaıdy infohub.kz saıty.
NUR.KZ agenttigi oblystyq polısıaǵa silteme jasap habarlaǵandaı, birneshe kún buryn 911.aktau Instagram paraqshasynda Ybyqty saı shatqalyndaǵy vandalızm áreketin beıneleıtin vıdeo jarıalanǵan. Kadrlarda jas jigittiń jartasqa tikeleı jazý jazyp jatqany kórinedi.
Búgin NUR.KZ tilshisine Mańǵystaý oblystyq polısıa departamentiniń baspasóz qyzmeti tabıǵı nysan aýmaǵyndaǵy vandalızm faktisi boıynsha qylmystyq is qozǵalǵanyn málimdedi. «34 jastaǵy kúdikti ustaldy. Tergeý jalǵasýda», — dedi polısıada.
Oblystyq polısıa departamenti vandalızm men tabıǵı nysandardy búldirýge jol berilmeıtinin eske saldy. Árbir mundaı faktige qatań quqyqtyq baǵa beriledi. Kináliler jaýapkershilikke tartylady, dep sendirdi baspasóz qyzmetinde.
Eske salaıyq, bıyl mamyr aıynda oblys polıseıleri Ybyqty saı aýmaǵynda óz esimi men kólik nómiri jazylǵan jazýlar qaldyrǵan er adamdy anyqtaǵan bolatyn. Sot oǵan 25 táýlik qamaý túrindegi jaza taǵaıyndady.