Shilde aıynda Qazaqstannyń bastapqy jáne qaıtalama naryqtarynda turǵyn úı baǵasy aıyna 1%-dan aspaıtyn qalypty qarqynmen ósti, al jaldaý baǵasy bir aıda 1,4%-ǵa qymbattady, dep habarlaıdy infohub.kz.
Jaldamaly turǵyn úı naryǵynda suranys joǵary kezeń bastaldy. Jańa oqý jyly qarsańynda Qazaqstannyń iri qalalaryna stýdentter keledi, olardyń kóbi jaldamaly baspana izdeıdi. Joǵary suranys óz kezeginde jaldaý baǵasynyń ósýine ákeledi.
Ulttyq statısıka búrosynyń derekterine sáıkes, shildede Qazaqstanda jaldamaly turǵyn úı bir aıda orta eseppen 1,4%-ǵa qymbattady. Qazir ol bir jyl burynǵydan 14,2%-ǵa qymbat.
Jaldaý quny eń kóp Astanada (2,4%), Kókshetaýda (1,5%) jáne Almatyda (1,4%) ósti. Shymkentte ósim bir aıda 0,9% qurady. Sonymen qatar, elimizdiń birneshe qalasynda baǵa bir aı burynǵy deńgeıde qaldy: Aqtóbe, Qaraǵandy, Petropavl, Taraz jáne Túrkistanda.
Qazir Qazaqstanda ortasha jaldaý baǵasy sharshy metrine 5 134 teńgeni quraıdy. Iaǵnı, shartty túrde 25 sharshy metrlik páter aıyna shamamen 128 350 teńge turady. Baǵa qalaǵa baılanysty aıtarlyqtaı ózgeredi: Almatyda jaldamaly turǵyn úıdiń bir sharshy metri orta eseppen 5 961 teńge, Astanada – 5 796 teńge, al eń tómen baǵa Tarazda tirkelgen – sharshy metrine nebári 2 515 teńge.
Jyljymaıtyn múlik satyp alýǵa keletin bolsaq, munda baǵanyń qalypty ósýi baıqalady. Shildede bastapqy turǵyn úı 0,7%-ǵa, al qaıtalama naryqtaǵy baǵa nebári 0,1%-ǵa qymbattady. Aılyq dınamıkada bastapqy naryqtaǵy eń joǵary ósim Petropavl men Oralda tirkeldi – tıisinshe 2,5% jáne 2,2%, odan keıin Almaty – 1,9%. Shymkentte baǵa bir aıda 1%-ǵa ósti, al Astanada maýsym deńgeıinde qaldy.
Qaıtalama naryqta ósim kóshbasshysy Qostanaı boldy – bir aıda 3,6%, odan keıin Jezqazǵan men Oral – tıisinshe 3,2% jáne 3%. Astanada baǵa bir aıda 0,6%-ǵa ósti, Shymkentte – 1,9%, al Almatyda baǵa bir aıda 0,8%-ǵa tómendedi.
Jyldyq kórsetkishte Qazaqstanda bastapqy turǵyn úı orta eseppen 14,6%-ǵa, al qaıtalama naryqtaǵy baǵa 9,5%-ǵa qymbattady. Qazir jańa páterlerdiń ortasha baǵasy sharshy metrine 621 900 teńgeni, al qaıtalama naryqta – 630 442 teńgeni quraıdy. Eń joǵary baǵa Almatyda: bastapqy naryqta orta eseppen 739 762 teńge, al qaıtalama naryqta – sharshy metrine 743 546 teńge. Astanada baǵa sál tómen – tıisinshe 739 033 teńge jáne 731 722 teńge.
Osylaısha, qazir jyljymaıtyn múlik naryǵynda baǵa qalypty ósip jatqanyn, al jaldaý baǵasy qarqyn ala bastaǵanyn atap ótýge bolady. Biraq jaldamaly turǵyn úı baǵasynyń ósý shyńy, mysaly, Almatyda ádette tamyz aıynyń sońy men qyrkúıekke keledi. Buǵan deıin sarapshylar joǵary maýsymda suranys qana emes, kúdikti usynystar sany da artatynyn eskertken bolatyn, sondyqtan jaldamaly baspana izdep júrgen qazaqstandyqtarǵa saq bolý kerek.