Jumys berýshi jalaqyny ýaqytynda jáne tolyq kólemde tóleýge mindetti. Keshiktirilgen ár kún úshin qyzmetkerge ósimaqy tólenýi tıis. Bul týraly Qazaqstannyń Eńbek jáne halyqty áleýmettik qorǵaý mınıstrligi eske salyp, jalaqy tólenbegen jaǵdaıda qaıda júginý kerektigin túsindirdi, dep habarlaıdy infohub.kz saıty.
Eńbek mınıstrliginiń saıtynda atap ótilgendeı, jumys berýshiniń basty mindetteriniń biri — qyzmetkerge jalaqyny ýaqytynda jáne tolyq tóleý. Tólemniń naqty kúni eńbek nemese ujymdyq shartta belgilenedi, biraq aıyna keminde bir ret jáne kelesi aıdyń birinshi onkúndiginen keshiktirilmeı jasalýy kerek.
Jalaqy keshiktirilse ne isteý kerek? Mınıstrliktiń dereginshe, eń aldymen qyzmetker jumys berýshige júginip, keshigý sebepterin anyqtap, qaryzdy óteýdi talap ete alady.
«Másele sheshilmese, qyzmetker jumys berýshiniń ornalasqan jeri boıynsha QR Eńbek jáne halyqty áleýmettik qorǵaý mınıstrligi Memlekettik eńbek ınspeksıasy komıtetiniń aýmaqtyq departamentine júginýge quqyly. Ótinishti eOtinish júıesi arqyly elektrondy túrde de berýge bolady», — dedi vedomstvoda.
Ótinishke eńbek qatynastaryn jáne jalaqy boıynsha qaryzdy rastaıtyn qujattardy qosa tirkeý usynylady. Olar eńbek sharty, esep aıyrysý paraqtary, bank úzindileri, buıryqtar jáne basqa da rastaıtyn materıaldar bolýy múmkin.
«Negizder bolǵan jaǵdaıda memlekettik eńbek ınspektorlary zańnamada belgilengen tártippen baqylaý is-sharalaryn júrgizedi. Qaryz faktisi rastalsa, jumys berýshige buzýshylyqty joıý, onyń ishinde jalaqy boıynsha qaryzdy óteý týraly oryndalýy mindetti nusqama beriledi. Nusqamanyń oryndalýy memlekettik eńbek ınspektorlarynyń baqylaýynda bolady. Sonymen qatar jumys berýshi qyzmetkerge jalaqy boıynsha qaryzdy ǵana emes, keshiktirilgen ár kúntizbelik kún úshin ósimaqyny da tóleýge mindetti. Onyń mólsheri jalaqy tóleý jónindegi mindetteme oryndalǵan kúni qoldanysta bolǵan QR Ulttyq bankiniń bazalyq mólsherlemesiniń 1,25 eselengen mólsherine qaraı esepteledi», — dep naqtylady Eńbek mınıstrligi.
Jumys berýshige qandaı jaýapkershilik qarastyrylǵan? Jalaqyny tolyq kólemde jáne belgilengen merzimde tólemegeni, sondaı-aq jumys berýshiniń kinásinen ósimaqyny eseptemegeni jáne tólemegeni úshin QR ÁQBtK-niń 87-baby ákimshilik jaýapkershilikti kózdeıdi.
Aıyppul mólsheri: laýazymdy tulǵalarǵa — 30 AEK (129 760 teńge); shaǵyn kásipkerlik sýbektilerine nemese komersıalyq emes uıymdarǵa — 60 AEK (259 500 teńge); orta kásipkerlik sýbektilerine — 100 AEK (432 500 teńge); iri kásipkerlik sýbektilerine — 150 AEK (648 750 teńge).