Áleýmettik jelilerde balany qatty urǵan sát túsirilgen vıdeo tarady. Jarıalanǵan kadrlardaǵy jazbaǵa sáıkes, oqıǵa Jambyl oblysynda bolǵan, al kúdikti — Qordaı aýdanynyń muǵalimi, dep habarlaıdy infohub.kz saıty.
Vıdeo astyndaǵy jazbada: «Qordaı muǵalimi balany qatty uryp, keıin zardap shekken balanyń ata-anasynan kópshilik aldynda keshirim surady» delingen.
Pedagogtiń ózi oqıǵa shamamen bir jyl buryn bolǵanyn túsindirdi. İsin emosıaǵa erik berip qoıýmen túsindirdi. Onyń aıtýynsha, ol kezde kinásin moıyndap, jasóspirimniń anasynan keshirim suraǵan. Endi ol oqýshynyń otbasynan kópshilik aldynda keshirim ótindi.
Jambyl oblysy polısıa departamenti NUR.KZ tilshisine bul derek boıynsha kámeletke tolmaǵan balany tárbıeleý mindetterin tıisinshe oryndamaý faktisi boıynsha qylmystyq is qozǵalǵanyn málimdedi.
Kúdikti ustaldy. Qazirgi tańda kámeletke tolmaǵan balanyń ómiri men densaýlyǵyna eshqandaı qaýip tónip turǵan joq.
«İs mán-jaıyn jan-jaqty, tolyq jáne obektıvti anyqtaý úshin qajetti tergeý áreketteri júrgizilýde. Olardyń nátıjesi boıynsha tıisti prosestik sheshim qabyldanady», — dedi vedomstvoda.