Жамбыл облысы Гвардейский кентінде әскери қызметшілерге арналған 120 пәтерлі екі үй бірнеше жылдан бері салынып бітпей тұр. 2021 жылы олардың дайындығы 90%-ға жеткен, алайда кейін көтергіш құрылымдарынан жарықтар табылған, деп хабарлайды infohub.kz сайты.
Мәселеге «Письма президенту» Telegram-арнасының авторлары назар аударған. Жарияланымда үйлердің жалпы 240 пәтерге арналғаны және бесінші жылдан бері бос тұрғаны, ал әскери қызметшілердің тұрғын үй күтіп жүргені айтылған.
Қорғаныс министрлігі «Курсивке» ақаулар анықталғаннан кейін құрылыстың тоқтатылғанын мәлімдеді.
«2021 жылы тұрғын үйлердің дайындық дәрежесі 90% болды. Сонымен қатар құрылыс салушылар тарапынан көтергіш құрылымдардан жарықтар анықталғандықтан, одан әрі жұмыстар тоқтатылды», — делінген ведомство жауабында.
Кейінгі тексерулер басқа да мәселелерді анықтады. Іргетастар бетонының нақты беріктігі жобалық талаптарға сәйкес келмеген, ал кейбір құрылымдарды күшейту қажет болған.
2026 жылдың шілдесінде үйлер тағы бір тексерілді. Мамандар құрылымдарды күшейтуді және ол үшін жобалық құжаттама дайындауды ұсынды. Қазір Қорғаныс министрлігінің дерегінше, мемлекеттік органдармен және сарапшылармен бірге техникалық шешімдер айқындалып, жобалық құжаттама түзетілуде. Ведомство жауабында құрылыстың нақты аяқталу мерзімі көрсетілмеген.
Екі үйге қанша бюджет қаражаты жұмсалғанын Қорғаныс министрлігі жариялаған жоқ.
«Құрылыс құны, қаржыландыру көлемі және мердігер ұйымдармен есеп айырысу туралы сұралған мәліметтер Бюджет кодексінің нормаларына және әскери жоспарлау жүйесі саласындағы заңнамаға сәйкес қорғалатын сипатқа ие және жариялауға жатпайды», — деп хабарлады ведомство.
Сонымен қатар министрлік Гвардейский гарнизонында кезекте тұрған әскери қызметшілер үшін бос қызметтік тұрғын үй жеткілікті екенін мәлімдеді.