Sońǵy bes jylda Qazaqstanda aýyr týa bitken patologıasy bar jańa týǵan nárestelerdiń otadan keıingi ólimi úsh eseden astamǵa tómendedi, dep habarlaıdy infohub.kz saıty.
Densaýlyq saqtaý mınıstrliginiń derekterine sáıkes, mundaı jaǵdaılardaǵy ólim-jitim 22%-dan 6,9%-ǵa deıin qysqardy, al otadan keıingi ómir súrý kórsetkishi osy kezeńde 84%-dan 93%-ǵa deıin ósti.
İshtegi nárestede týa bitken aqaýlar anyqtalǵan júkti áıelderdi mamandandyrylǵan perınataldyq ortalyqtarǵa jiberedi. Onda dárigerler júktilik, bosaný jáne balaǵa týǵannan keıin birden medısınalyq kómek kórsetý taktıkasyn aldyn ala josparlaıdy.
Qazirgi prenataldyq dıagnostıka ádisteri kóptegen týa bitken patologıalardy júktilik kezinde, onyń ishinde 18–20 apta merziminde anyqtaýǵa múmkindik beredi. Bul balanyń ómiriniń alǵashqy kúnderinde ota qajet bolsa, oǵan aldyn ala daıyndalýǵa múmkindik beredi. Elimizde jyl saıyn jańa týǵan nárestelerge shamamen 1,4 myń ota jasalady.
Fetaldyq hırýrgıa — júktilik kezinde uryqqa jasalatyn otalar — jeke baǵyt bolyp qala beredi. Qazirgi ýaqytta Almaty men Astananyń mamandandyrylǵan ortalyqtarynda osyndaı 39 ota jasaldy.
Mınıstrlikte sondaı-aq búginde jańa týǵan nárestelerge jasalatyn otalardyń úshten biri az ınvazıvti tásilmen — kishkene tesikter arqyly jasalatynyn habarlady. 2022 jyldan bastap elimizde tynys alýy buzylǵan jańa týǵan nárestelerdi emdeý úshin ekstrakorporaldyq membranalyq oksıgenasıa (EKMO) da qoldanylady.
Aldaǵy jyldary Densaýlyq saqtaý mınıstrligi kúrdeli otalarǵa daıyndyq kezinde genetıkalyq tehnologıalardy, 3D-modeldeýdi, sondaı-aq óńirlerde telemedısınalyq keńesterdi qoldanýdy keńeıtýdi josparlap otyr.
Buǵan deıin Qazaqstanda 2025 jyldyń qorytyndysy boıynsha sábıler ólimi 14%-ǵa tómendegeni, al 2026 jyldyń alǵashqy úsh aıynda ana ólimi 43%-ǵa azaıǵany habarlanǵan bolatyn.