Salynyp jatqan kópqabatty úılerden baspana alatyn qazaqstandyqtar qurylys salýshyǵa tek brondaý nemese aldyn ala shart negizinde aqsha bermeýi kerek. Eń aldymen kompanıanyń úleskerlerdiń qarajatyn qabyldaýǵa quqyǵy bar ekenine jáne úlestik qatysý shartynyń tirkelgenine kóz jetkizý qajet. Bul týraly qurylys jáne turǵyn úı-kommýnaldyq sharýashylyq isteri jónindegi komıtet eskertti, dep habarlaıdy infohub.kz saıty.
Zańnama qurylys salýshynyń azamattardyń qarajatyn turǵyn úı salýǵa tartýynyń úsh negizin ataıdy: Biryńǵaı operatordyń kepildigi, ekinshi deńgeıdegi banktiń jobaǵa qatysýy nemese kópqabatty úıdiń qańqasy turǵyzylǵannan keıin úleskerlerdiń qarajatyn tartý. Osy negizderdiń eshqaısysy bolmasa, qurylys kezeńinde páterdi tóleýge keńes berilmeıdi.
Mámile aldynda turǵyn úı kesheniniń qujattaryn jáne shart talaptaryn zerdeleý de mańyzdy. Onda páterdiń quny, tóleý tártibi, qurylys jáne baspanany tapsyrý merzimderi, sondaı-aq taraptardyń quqyqtary men mindetteri kórsetilýi tıis. Úlestik qatysý sharty mindetti túrde tirkelýge jatady.
Komıtet mamandarynyń pikirinshe, úlestik qatysý shartynyń ornyna satyp alýshyǵa aldyn ala shart, brondaý sharty nemese ınvestısıalyq kelisim usynylǵan jaǵdaılar erekshe alańdaýshylyq týǵyzýy kerek.
«Sharttyń ataýynyń ózi mámileniń zańdylyǵyn anyqtamaıdy. Eger qujat kópqabatty turǵyn úı salýǵa azamattardyń qarajatyn zańda belgilengen tetikterdi aınalyp ótip tartý úshin paıdalanylsa, mundaı sqemaǵa jol berilmeıdi», — dep atap ótti komıtette.
Qurylys salýshy jáne turǵyn úı kesheni týraly málimetterdi resmı sıfrlyq servıster, sonyń ishinde Homeportal.kz jáne eGov arqyly tekserýge bolady.
Satyp alýshylardyń aqshasyn zańnama talaptaryn aınalyp ótip tartqany úshin aıyppuldar qarastyrylǵan. Jeke tulǵalarǵa — 200 AEK, shaǵyn bızneske — 500 AEK, orta bızneske — 750 AEK, iri bızneske — 1 myń AEK. Qaıtalap buzǵan jaǵdaıda iri bızneske 2 myń AEK aıyppul salynady.
Komıtette tólem jasamas buryn qurylys salýshyny jáne turǵyn úı keshenin tekserýdi, kompanıanyń qandaı negizde aqsha tartyp jatqanyn anyqtaýdy, shartty muqıat zerdeleýdi jáne úlestik qatysý shartynyń tirkelgenine kóz jetkizýdi usynady.
Buǵan deıin «Kýrsıv» Astananyń oń jaǵalaýyndaǵy páterler sol jaǵalaýǵa qaraǵanda kóbirek tabys ákeletinin jazǵan bolatyn.