Orta salmaqtaǵy Dúnıejúzilik boks keńesiniń (WBC) qazirgi álem chempıony domınıkandyq Karlos Adames qazaqstandyq boksshy Jánibek Álimhanulyn dopıng janjalyn eske salyp, jekpe-jekke shaqyrdy, dep habarlaıdy infohub.kz saıty.
«Eı, Jánibek, sen tazardyń ba? Qazir tóbeleskiń kele me? Daıynsyń ba? Kettik, jasaıyq», — dep jazdy Adames X áleýmettik jelisinde qazaqstandyq sportshynyń paraqshasyn belgilep.
Buǵan deıin Karlos Adames ekinshi orta salmaqqa (76,2 kg-ǵa deıin) kóterilý nıetin málimdegen. Dál osy salmaq dárejesinde qazir Jánibek Álimhanuly óner kórsetip júr. Ol Dúnıejúzilik boks uıymynyń (WBO) reıtıńinde birinshi orynda tur jáne brıtanıalyq Hamza Shıraz onymen jekpe-jekten bas tartqan soń, bos chempıondyq belbeý úshin qarsylasynyń taǵaıyndalýyn kútýde.
Eske salaıyq, Jánibek Álimhanulyna qatysty dopıng janjaly 2025 jyldyń jeltoqsanynda bolǵan edi. Kýbalyq Erıslandı Laraǵa qarsy úsh belbeý úshin ótetin asa mańyzdy biriktirýshi jekpe-jek qarsańynda onyń dopıng synamasynan tyıym salynǵan meldonı preparaty tabyldy. Aqpanda WBO boksshyǵa qatysty tártiptik sheshim shyǵardy. Keıin uıym Jánibekti chempıondyq josparlarynda esepke alýdy jalǵastyryp, tamyzda ony ekinshi orta salmaqtaǵy WBO belbeýine mindetti úmitker etip taǵaıyndady.
Karlos Adames áleýetti jekpe-jek aldynda Jánibekti «tazalyǵy» týraly suraqpen shymshyp alýdy uıǵarǵanda, dál osy oqıǵany esine aldy.