Qazaqstandyq boksshy Jánibek Álimhanuly WBO nusqasy boıynsha ekinshi orta salmaqtaǵy álem chempıony brıtandyq Hamza Shırazdyń olardyń arasyndaǵy yqtımal jekpe-jek týraly pikirine jaýap berdi, dep habarlaıdy infohub.kz.
Buǵan deıin Dúnıejúzilik boks uıymy (WBO) Shırazdy Álimhanulyǵa qarsy ataǵyn qorǵaýǵa mindettegen edi. Qazaqstandyq uıym reıtıńinde ekinshi orynda tur. Brıtanıalyq bul sheshimdi synǵa alyp, qazaqstandyqqa qatysty dopıng oqıǵasyn eske saldy.
Álimhanuly óz kezeginde qazirgi chempıondy jekpe-jekke kelisip, rıngte óz basymdyǵyn dáleldeýge shaqyrdy.
«Nege ol jaı ǵana: "Káne, tóbeleseıik!" demeıdi? Bul — sport! Eger ózińdi chempıonmyn dep atasań, sony dálelde. Shyǵyp, úzdiktermen shaıqas, bárine shynaıy kim ekenińdi kórset. Podkastta otyryp, jylap-eńirep júrme — rıngke shyǵyp, tóbeles!» — dep jazdy Álimhanuly áleýmettik jelidegi X paraqshasynda.
Eske salaıyq, ótken jyldyń jeltoqsanynda qazaqstandyq boksshy meldonıge oń nátıje bergennen keıin bir jylǵa dıskvalıfıkasıalanǵan edi. Alaıda bıyl jazda is qaıta qaralyp, WBO Álimhanulynyń dıskvalıfıkasıasyn merziminen buryn toqtatý týraly sheshim qabyldady.
Endi qazaqstandyq WBO nusqasy boıynsha ekinshi orta salmaqtaǵy tıtýlǵa resmı úmitker bolyp tabylady.