Qazaqstannyń eńbek jáne halyqty áleýmettik qorǵaý mınıstri Asqarbek Ertaev úkimet otyrysynda Sıfrlyq jumyspen qamtý qyzmetiniń jańa múmkindikteri týraly aıtty, dep habarlaıdy infohub.kz saıty.
Engiziletin modeldiń basty maqsaty — azamattardy jumyspen qamtýdy proaktıvti qamtamasyz etýge kóshý. Negizgi qaǵıdat: adam jumys izdemeıdi, kerisinshe jumys adamdy ózi tabady. Buryn azamat portaldaǵy bos jumys oryndaryn ózi qarap, mansap ortalyǵyna júginýge májbúr bolsa, endi júıe jumys berýshilerdiń qajettilikterine qaraı jumysqa ornalasýǵa muqtaj adamdardy ózi anyqtaıdy. Tıisti habarlamalar eGov jáne Enbek.kz mobıldi qosymshalary arqyly, sondaı-aq 1414 nómirinen SMS túrinde jiberiledi.
Jasandy ıntellekt aımaq ishinde de, odan tys jerlerde de, onyń ishinde jumysshy mamandyqtary boıynsha jeke bos jumys oryndaryn tańdaıdy. Sonymen qatar, azamattarǵa oqýdan ótý, qaıta daıarlaý nemese kóshi-qon baǵdarlamalaryna qatysý múmkindikteri usynylady. Nátıjesinde árkim turaqty jumysqa ornalasqanǵa deıin súıemeldenedi.
Shilde aıynda qyzmet Pavlodar oblysynda iske qosyldy: jumysqa ornalasý máseleleri boıynsha 39 myń SMS habarlama jiberildi, osy kezeńde aımaqta 962 adam jumys tapty. Qyrkúıekte qyzmetti Mańǵystaý oblysynda engizý josparlansa, jyl sońyna deıin eldiń barlyq 20 óńirinde engiziledi. Uqsas qyzmet Aitu mobıldi qosymshasy arqyly qoljetimdi bolady, onda jasandy ıntellekt kómekshisi qolaıly bos jumys oryndary men oqý kýrstaryn tańdaıdy.
Aǵymdaǵy jyldyń sońyna deıin jasandy ıntellekt taǵy bes baǵytta engiziledi. Úshinshi toqsanda jasandy ıntellekt qandas mártebesin berý nemese uzartý, jumyspen qamtýǵa járdemdesý sharalaryna joldama berý, kásibı eńbekke qabilettiligin joǵaltý dárejesin anyqtaý (medısınalyq derekterdi taldaý jáne jaraqat saldaryn baǵalaý), sondaı-aq zeınetaqy taǵaıyndaý kezinde — qujattardy taný jáne jalǵandyqty boldyrmaý úshin qoldanylatyn bolady.
Tórtinshi toqsanda skanerlengen eńbek kitapshalaryn taný, jasy boıynsha zeınetaqy tólemderin taǵaıyndaý kezinde usynystar qalyptastyrý úshin sıfrlyq modelder ázirleý, sondaı-aq el kásiporyndaryndaǵy eńbek qaýipsizdigi men eńbek jaǵdaılary salasyndaǵy eńbek táýekelderin anyqtaý úshin jasandy ıntellektke negizdelgen taldaýdy engizý josparlanýda.